Şam-SANA
Wezîrê Enerjîyê Mihemed El-Beşîr duh Şemîyê, pêşnîyarên Komîteya Daîmî ya Dîyarkirina Bihayên Berhemên Petrolê û Samanên Madenî yên ku di civîna wê ya awarte de derketine pejirandin, ku kêmkirina bihayên di navbera zêdetirî %14 û %20 de li xwe digire, ev yek piştî lêkolînkirina daneyên teknîkî û aborî yên girêdayî ketwara bazara berhemên petrolê pêk hat.
Wezîrê Enerjîyê di daxuyanîyekê de li ser platforma “X”ê got: “Me îro biryareke nû ji bo pejirandina lîsteya nirxên berhemên neftê, li ser bingeha pêşnîyarên komîteya daîmî ya pispor da, ya ku li gorî lêkolîneke hûrbîn a daneyên teknîkî û aborî kar dike, bi awayekî ku biryarên baş lêkolînkirî misoger dike da ku hevsengîyê di navbera aramîya bazarê, berdewamîya peydabûna berhemên neftê û berjewendîya welatîyan de pêk bîne.”.
Wezîr El-Beşîr li zêde jî kir û got: “Em ji bo çespandina rêbazeke sazûmanî kar dikin ku xwe dispêre şefafîyet, lêvegera dewrî û girtina biryaran li ser bingehên zanistî û aborî, bi awayekî ku xizmeta welat û welatîyan bike.”
Di heman çarçoveyê de, Wezareta Enerjîyê di kanala xwe ya Telegramê de dîyar kir ku lîsteya bihayên nû ya pejirandî ya ku ji dema derketina xwe ve ketiye warê cîbicîkirinê, ev xalên li jêr li xwe girtine:
- Benzîna Oktan (95): Bi rêjeya %20.39 hat kêmkirin, bi vî rengî bihayê lîterekê bû 130 lîreyên Sûrî yên nû.
- Benzîna Oktan (90): Bi rêjeya %19.97 hat kêmkirin, bi vî rengî bihayê lîterekê bû 125 lîreyên Sûrî yên nû.
- Dîzel: Bi rêjeya %14.37 hat kêmkirin, bi vî rengî bihayê lîterekê bû 107 lîreyên Sûrî yên nû.
- Botla Gaza malê: Bihayê wê bi rêjeya %15.49 hat kêmkirin, û bû 1,500 lîreyên Sûrî yên nû.
- Botla Gaza pîşesazî: Bihayê wê bi rêjeya %15.49 hat kêmkirin, û bû 2,400 lîreyên Sûrî yên nû.
