Şam-SANA
Keleha Şamê hembêza xwe ji 23 berhemên şûnwarî yên Sûrî re vedike, ku di Tîrmeha borî de piştî 15 salan ji Fransayê vegerîyan welat.
Ev yek di çarçoveya pêşangehekê de tê ku wekî beşekî ji Festîvala “Havîna Sûrîyê ya Malbatê 2026” tê lidarxistin, ku derfetê dide malbat, zarok û nûciwanan da ku nimûneyên mîrata Sûrîyê ya di nav serdemên cuda yên dîrokê de nas bikin.
Berhemên ku serdem û herêmên cuda yên Sûrîyê nîşan didin
Rêveberê Giştî yê Şûnwar û Muzexaneyan Dr. Mesûd Bedewî di daxuyanîyekê de ji bo SANAyê dîyar kir ku berhemên hatine nîşandan xwedî nirxekî dîrokî yê mezin in.
Ev berhem vedigerin serdemên cuda ku ji serdemên berî dîrokê dest pê dikin û heta serdema Osmanî dirêj dibin, ev yek jî dewlemendî û cihêrengîya şaristanîya Sûrîyê nîşan dide.
Ji muzexaneyên Sûrîyê ber bi Parîsê û piştre vegera li welêt
Bedewî da zanîn ku ev berhem ji sala 2010an ve ji bo pêşangeheke şûnwarên Sûrî li Peymangeha Cîhana Erebî li Parîsê hatibûn deynkirin, lê ji ber qutbûna têkilîyên Sûrîye û Fransayê di serdema rejîma berê de, vegerandina wan hatibû astengkirin.
Pêşwazîyeke berbiçav û hişyarîya zêde li ser nirxê şûnwaran
Bedewî tekez kir ku pêşangeh rastî pêşwazîyeke mezin a xelkê hat û wî ji roja yekem ve balpêdana serdankeran a bi berheman dît.
Wî got: “Berê hinek serdankeran berhemên şûnwarî wekî karekî hunerî didîtin û derbas dibûn, lê îro em dibînin ku hejmareke mezin a xelkê li ber berheman radiwestin, ravekirinên li ser wan dixwînin, li hûrgilîyên wan dinêrin û dîroka wan nas dikin. Ev dîyardeyeke pir erênî ye.”
Vegerandina berheman ji bo muzexaneyên wan ên resen
Derbarê çarenivîsa vê komê piştî bidawîbûna pêşangehê, Bedewî eşkere kir ku her parçeyek dê vegere muzexane yan cihê xwe yê resen ku jê hatibû wergirtin, çi li Şam, Heleb, Laziqîye, Dera yan cihên din be.
Ev berhem nûnertîya cihêrengîya cografî û şaristanî ya Sûrîyê dikin ku perav, bakur, başûr û herêma Cezîrê li xwe digire.
Giringîya hişyariya şûnwarî
Bedewî bal kişand ser pêdivîya hişyarkirina nifşan li ser giringîya şûnwaran, ku divê ev yek ji baxçeyê zarokan dest pê bike û di hemû qonaxên xwendinê de heta zanîngehan bi rêya bernameyên zanistî û çandî berdewam bike.
Bi nîşandana van 23 berheman di Keleha Şamê de, rêwîtîya wan a 15 salan bi dawî dibe. Vegerandina wan û nîşandana wan di Festîvala “Havîna Sûrîyê ya Malbatê 2026” de, pêngaveke girîng e di parastina mîrata Sûrîyê de û girêdana nifşên nû bi bîrewerîya şaristanî ya welatê wan re.
