Eman-SANA
Serokê Senatoya Urdinê Feysel El-Fayiz, îro Duşemê piştrast kir ku têkilîyên Sûrî û Urdinî di qonaxa xwe ya herî baş a dîrokî de ne. Her wiha bal kişand ser hebûna hevkarîyeke stratejîk a ku li ser bingehê berjewendîyên hevbeş ên ewlehî û aborî hatiye avakirin.
Ajansa Nûçeyan a Urdinê “PETRA” ji zarê El-Fayiz di daxuyanîyekê de ragihand: “Urdin bûye yek ji hevkarên herêmî yên herî nêzîk ji bo Sûrîyê.” Her wisa bal kişand ser damezrandina Encumena Bilind a Hevahengîyê ya Urdinî-Sûrî di sala 2025an de, ku rûniştinên wê li Eman û Şamê bi beşdarîya wezîrên her du alîyan hatin lidarxistin.
Têkilîyên di navbera Sûrîye û Urdinê de guherîneke berbiçav ber bi hevkarî û temamkerîyê ve, her wiha derbasbûna nava qonaxeke nû ya hevkarîya li ser bingehê berjewendîyên dualî dibînin.
Ji alîyekî din ve, El-Fayiz dîyar kir ku êrîşên Îranê yên li ser Urdinê û welatên Kendava Erebî, binpêkirineke eşkere ya qanûna navneteweyî û peymana Neteweyên Yekbûyî ne. Wekî din jî, bal kişand ser wê yekê ku welatê wî ji ber armancgirtina rasterast a di encama vê alozîya herêmî ya metirsîdar de, rûbirûyî astengîyên nedîtî dibe, bi rengekî ku bûye armanceke rasterast a êrîşên Îranê.
El-Fayiz tekez jî kir ku Urdin nabe qada tu pevçûneke herêmî û rê ji bo tu êrîşeke li dijî tu welatekî bira yan dost nayê dayîn ku Urdin bê bikaranîn. Her wisa destnîşan kir ku welatê wî pabendî binemayên cîrantîya baş û desttênewerdana di karûbarên yên din de ye.
Derbarê çawanîya astengkirina êrîşên Îranê yên dubare yên li ser welatên Erebî, El-Fayiz got: “Divê neteweya Erebî li ber mezinahîya metirsîyên ku rûbirûyî wan bûye bikeve; lewra, ev yek xurtkirina pergala ewlehî û bergirîya Erebî ya hevbeş ji bo parastina ewlehî û serwerîya welatên Erebî ji destwerdanên herêmî û navneteweyî dixwaze.”
Li dawîyê jî, El-Fayiz daxwaz ji civaka navneteweyî kir ku berpirsyarîyên xwe bigire ser milên xwe û ji dil hewl bide ji bo ku êrîşên Îranê yên li ser welatên herêmê rawestîne. Her wisa rêzgirtina li qanûna navneteweyî bide ferzkirin û nakokîyên herêmê li gorî çarçoveyên sîyasî û vegera li biryarên rewatîya navneteweyî, bi dawî bîne.
Her wekî tê zanîn jî, Urdinê gelek caran pêwîstîya piştgirîkirina hewldanên ku armanca wan bidawîanîna alozîya li herêmê û çareserkirina hemû sedemên rageşîyê ye piştrast kiriye, ligel misogerkirina azadîya deryavanîyê di Tengava Hurmuz û Deryaya Sor de, û pêkanîna ewlehî û aramîya mayînde.
