New York-SANA
Nûnerê Daîmî yê Sûrîyê li Neteweyên Yekbûyî (NY) Balyoz Îbrahîm Ulebî tekez kir ku tiştê vê dawîyê li bakurrojhilatê Sûrîyê pêk hat yekîtîya Sûrîyê diparêze û piştrast dike ku di Komara Sûrîyê ya nû de ti kes ne serkeftî û ne jî binkeftî ye lê ev serkeftinek e ji bo hemû Sûrîyan.
Ulebî di daxuyanîyekê di rûniştina Encûmena Ewlekarîyê ya Navdewletî de derbarê Sûrîyê roja înê got: “Ez kêfxweş im ku spasîya we hemûyan bikim, we di daxuyanîyên xwe de careke din nîşan da ku Encûmen di piştgirîkirina xwe ji bo Sûriyê de li ser rêya avakirina welat û ber bi paşerojê ve yekgirtî ye.”
Ulebî got: “Bakurrojhilatê Sûrîyê êdî wekî berê ne arîşeyeke aloz e, lê bûye destkefteke niştimanî ku rêya ber bi aramîyê ve sergihayî dike, piştî ku lihevkirina giştgir a agirbest û tevlîbûna tam bi Hêzên Sûrîya Demokratîk (HSD)ê re ket warê cîbicîkirinê.”
Ulebî di berdewamîya axaftina xwe de wiha got: “Yekkirina sazîyên leşkerî û sivîl ên Rêveberîya Xweser di nav sazîyên dewletê de dest pê kir. Nêzîk dê hilbijartinên Encûmena Gel li Dêrezor, Reqa û Hesekê jî pêk werin.” Ulebî amaje bi wê yekê kir ku cara yekem e ji dema serxwebûna Sûrîyê ve hilbijartinên Encûmena Gel li wan herêman bi her du zimanên Kurdî û Erebî tên ragihandin.
Ulebî tekez kir ku tiştê li bakurrojhilatê Sûrîyê pêk hat yekîtîya welat diparêze, û piştrast dike ku di Komara Sûrîyê ya nû de ne serkeftî û ne binkeftî hene, lê serkeftinek e ji bo hemû mêr û jinên Sûrî û bi destên wan hemûyan e.
Navborî dîyar kir ku Sûrîyê dest bi vegerandina şewqa xwe ya çandî, ramanî û aborî kiriye, ku berî çend rojan gera awarte ya Pêşangeha Navdewletî ya Pirtûkan a Şamê bi beşdarîya zêdetirî 35 welatan hat vekirin. Her wiha beşeke taybet ji bo zimanê Kurdî hat veqetandin piştî ku axaftina bi vî zimanî bi dehan salan wek sûcekî dihat dîtin.
Nûnerê Daîmî yê Sûrîyê li NY Îbrahîm Ulebî daxuyanîya xwe bi van gotinan bi dawî kir: “Tiştê ku min îro pêşkêşî we kir ne gotareke sîyasî ye, lê rêyeke niştimanî ye ku bi aramî û bi bawerîya mêr û jinên Sûrî ber bi pêş ve diçe. Va ye Sûrîye bi gel, sazî, yekîtî, pirrengî û azadîya raderbirîna xwe re baş dibe.”
