Hewlêr-SANA
Serokê Herêma Kurdistanê Nêçîrvan Barzanî pêşwazî li lihevkirina giştî ya navbera Hikûmeta Sûrîyê û Hêzên Sûrîya Demokratîk (HSD) kir û tekez kir ku ev pêngaveke girîng e ji bo jinûveavakirina Sûrîyeke yekbûyî û aram.
Malpera “Kurdistan 24” ji zarê Barzanî di daxuyanîyekê de îro înê ragihand: “Em pêşwazî û piştgirîyê li lihevkirina navbera Hikûmeta Sûrîyê û Hêzên Sûrîya Demokratîk (HSD)ê dikin; ji ber rola wê ya di rawestandina şer, yekkirina sazîyên leşkerî û îdarî, dabînkirina mafên sivîl û perwerdehîyê yên gelê Kurd û amadekirina mercan ji bo vegera koçberan bo herêmên wan ên resen.”
Barzanî destnîşan kir ku ev lihevkirin pêngaveke girîng û rast e ber bi çareserîyeke aştîyane ve, û zemîneyeke xurt ji bo aramî, aştîya civakî û pêkvejîyana aştîyane di navbera pêkhateyên cuda de peyda dike. Barzanî hêvî kir ku ev lihevkirina giştî bibe destpêkek ji bo jinûveavakirina Sûrîyeke yekbûyî, ligel dabînkirina mafên gelê Sûrîyê bi hemû pêkhateyên wê û pêkanîna ewlehî û aramîyê li Sûrîye û herêmê bi giştî.
Hikûmeta Sûrîyê îro ragihandibû ku bi Hêzên Sûrîya Demokratîk (HSD) re li ser rawestandina şer, di çarçoveya peymaneke giştî de û li ser pêvajoyeke yekkirina gav bi gav a hêzên leşkerî û îdarî di navbera her du alîyan de lihevhatin çêbûye.
