Beyrût-SANA
Wezîrê Derve û Koçberan Es`ed Hesen El-Şeybanî, tekez kir ku Sûrîyê rijd e ku hemû astengîyên berê yên bi Libnanê re derbas bike, û ji bo xurtkirina têkilîyên li ser bingeha rêzgirtina dualî û berjewendîyên hevpar ku xizmeta her du gelan dikin, kar bike.
Şeybanî di daxuyanîyekê de piştî hevdîtina xwe ya îro bi hevtayê xwe yê Libnanî Yûsif Recî re li Beyrûtê, ji rojnamevanan re got: “Ev serdan li ser fermana Serok Ehmed El- Şeri` pêk tê ji bo tekezkirina kûrahîya têkilîyên di navbera her du welatan de, û ji bo nîşandana rêgeha nû ya Sûrîyê ya li ser bingeha rêzgirtina dualî.”
Şeybanî da zanîn ku Sûrîye dikeve qonaxa başbûn û jinûveavakirinê, û yek ji bingehên herî girîng ên wê avakirina têkilîyên sîyasî li ser bingeha hevkarîya dualî, rêzgirtina li serwerîya welatên cîran û destnewerdana di karûbarên wan de ye.
Her wiha Şeybanî amaje bi wê yekê kir ku derfeteke dîrokî heye ku têkilîya di navbera Sûrîye û Libnanê de ji têkilîyeke ewlekarî ya aloz a berê, veguhere hevbeşîyeke sîyasî û aborî ku di berjewendîya her du gelên Sûrî û Libnanî de be.
Wezîr Şeybanî ji bo vehewandina penaberên Sûrî di dema borî de, tevî zext û rewşa aborî ya dijwar a ku pê re rû bi rû ye, spasîya Libnanê kir.
Wezîrê Derve yê Libnanê Yûsif Recî, ji alîyê xwe ve got: Ev serdan destpêka rûpeleke nû û nîşaneke baş e ji bo destpêkirina rêyeke nû ya têkilîyên di navbera her du welatan de li ser bingeha hevkarî, geşepêdan û geşedana aborî.
Recî da zanîn ku her du alîyan li hev kiriye ku komîteyên hevbeş ji bo çareserkirina pirsgirêkên heyî ava bikin, tekez jî kir ku nîyeteke jidil a her du alîyan ji bo avakirina têkilîyên dualî yên xurt heye.
