Waşington-SANA
Kompanya “OpenAI”yê ragihand ku wê modeke nû bi navê “Ultrafast” daye destpêkirin, ku performansa modela xwe ya zîrekîya destkird “GPT-5.6 Sol” li gorî karkirina asayî heta 14 qatan leztir dike, di gavekê de ku armanc jê dabînkirina bersivdanên zûtir di hindek bikaranînan de ye.
Malpera teknolojîyê ya “TechCrunch”ê di raporeke ku duh Pêncşemê weşandibû de dîyar kir ku kompanyê eşkere kiriye ku moda nû dikare di çirkekê de heta 750 nîşanên nivîsî (token) hilberîne, ev yek jî derfetê dide modelê ku karan bi lezeke bilindtir pêk bîne, nexasim di sepanên ku hewcedarîya wan bi bersivdana hema bêje yekser heye.
“OpenAI”ê dîyar kir ku “Ultrafast” li şûna ku tenê pişta xwe bi modelên biçûktir an yên pispor ve girêbide ji bo bidestxistina leza bersivdanê ya xwestî, giranîyê dide ser zêdekirina qebareya karê ku di çirkekê de dikare bê encamdan.
Kompanya balê dikişîne ser egera bikaranîna moda nû di hejmarek sepanên karsazîyê de, ji wan bersivdana ji bo bûyeran, xizmeta bikarhêneran û piştevanîya teknîkî, ravekirina bazarên darayî, û bazirganîya elektronîkî, tevî karên din ên ku pêdivîya wan bi karkirineke lezgîn heye.
”Ultrafast” di guhertoya xwe ya ceribandinê ya niha de xwe dispêre hevkarîya di navbera OpenAI û kompanya Cerebrasê de ku di çêkirina çîpên zîrekîya destkird de pispor e, di heman demê de gihîştina wê di vê gavê de tenê ji bo komeke bisînor a bikarhêneran e.
OpenAI bi nîyaz e ku bi zêdekirina şîyana wergirtinê re çarçoveya berdestbûna moda nû berfireh bike, di demekê de ku kompanyên zîrekîya destkird berê xwe didin pêşxistina modelên ku performansa pêşketî û leza bersivdanê pev re dicivînin.
