London-SANA
Serok Ehmed El-Şeri’ beşdarî rûniştineke dîyalogê li Peymangeha Şahane ya Karûbarên Navneteweyî “Chatham House” li Londonê paytexta Brîtanyayê bû.
Serok El-Şeri’ di rûniştina dîyalogê de got:
- Brîtanya beşdarî di piştgirîkirina Sûrîyê û rakirina cezayên li ser gelê Sûrîyê de kir. Me îro hevdîtinên berhemdar pêk anîn ku dê têkilîyan hîn bêtir xurt bikin.
- Derbarê karûbarên navxweyî yên Sûrîyê, me dîyalogeke niştimanî pêk anî ku di encamê de çend raspêrî û “Danezana Destûrî” derketin holê. Her wiha me hilbijartinên Encumena Gel li dar xistin ku dê rûniştina wê ya yekem meha bê dest pê bike. Di dawîya serdema veguhêz de, em ê bingeha hilbijartinên azad li Sûrîyê amade bikin.
- Ji dema ku em gihîştine Şamê, çek tenê di destê dewletê de hatine komkirin û serwerîya qanûnê hatiye sepandin. Nabe ku li Sûrîyê kom û komikên çekdar hebin.
- Peymana tevlîkirina “HSD”ê di nava dewleta Sûrîyê de bi rêk û pêkî dimeşe, û piranîya dewletan piştgirîya vê peymanê kirin. Lê “HSD”ê di cîbicîkirina wê de bi paş ket û di hesabên xwe de şaş bû. “HSD”ê xwedî rewayetîyeke demkî bû ji bo şerê li dijî DAIŞê, lê niha dewleta Sûrîyê rewayetîya niştimanî û navdewletî bi dest xistiye, û piştî tevlîbûna di Hevpeymanîya Navdewletî de, erkê şerê li dijî DAIŞê derbasî ser milê dewletê bûye.
- Îsraîlê bi awayekî neyînî ligel Sûrîyê tev gerîya, û me bi rêya dîyalog û gotûbêjan hewl da em bigihin xalên baş, lê di kêlîyên dawî de her tişt guherî.
- Erkê Dewleta Sûrîyê ye ku sînorên xwe biparêze, û me baca destwerdana Hizbullahê ya li Sûrîyê da, û em xemxur bûn ku nakokî negihîjin Libnanê.
- Peywendîyên dîrokî di navbera Rûsya û Sûrîyê de hene; ku tu rojekê li Koşka Spî û roja din li Kremllînê bî, ev belgeya çalaktîya dîplomasîya Sûrîyê ye.
- Şert û mercên dîrokî li herêmê hene, lê ji kêlîya yekem ve me hewl da Sûrîyê ji wan alozîyên ku diqewimin dûr bixînin.
- Di nav pêşengîyên sîyaseta Sûrîyê de, dadwerîya veguhêz heye ku hewcedarîya wê bi avakirina sazîyan û lêvegereke qanûnî ya zelal ji bo hemû gel heye, da ku hesab ji her kesê ku tawan kirine were xwestin.
- Dewletên Ewropî penaberên Sûrî bi spasdarî pêşwazî kirin. Divê ev qencîya ku van dewletan nîşan daye bi rengekî neyînî bi dawî nebe û em hêvî dikin ku vegera kesên dixwazin bi dilxwazî be.
- Yek ji mijarên girîng, vegera hesta girêdana niştimanî, avakirina nû û peydakirina derfetên kar e ji bo handana vegera penaberan. Ji ber vê yekê, me derfeta veberhênanê ji bo penaberan pêşkêş kir, da ku ezmûnên xwe yên li xerîbîyê veguhêzin welatê xwe yê dayik.
