Şam-SANA
Serok Ehmed El-Şeri’ bal kişand ser rola girîng û zindî ya rêxistinên civaka sivîl di piştgirîkirina civaka Sûrîyê di salên şer de û di qonaxa niha de ku li ser jinûveavakirinê û hêsankirina vegera koçberan bo deverên wan radiweste.
Di hevdîtina xwe ligel nûnerên rêxistinên civaka sivîl li Sûrîyê, Serok El-Şeri’ spasîya xwe ji bo karên van rêxistinan di nav 14 salan de dîyar kir, xasma di salên şoreşê de û êş û azarên mirovî yên ku di kampan de hatin kişandin.
Serok El-Şeri’ eşkere kir ku têkilîya di navbera sazîyên hikûmî û rêxistinên civaka sivîl de li ser bingeha temamkirina rolan e. Serok tekez kir ku ya herî giring lihevkirina li ser armancên bilind û xebata bi dilsozî ye ji bo xizmeta civakê, ligel hebûna çavdêrîya hevbeş ku hevkarîyê xurtir dike.
Serok El-Şeri’ dîyar kir ku armanca vê hevdîtinê guhdarîkirina li wan astengîyên ku di dema kar de li pêşîya rêxistinan derdikevin e, da ku dewlet wan çareser bike, ev yek jî bibe sedema lezkirina pêşkêşkirina xizmetguzarîyan ji xelkê re û baştirkirina bersivdayîna pêdivîyên wan.
Serok El-Şeri’ destnîşan kir ku hikûmetê di dawîya sala 2025an de lêkolînên derbarê dosyaya kampan de encam dane. Serok hêvî kir ku sala 2026an bibe saleke ku tê de di vê dosyayê de pêşketineke mezin çêbibe, bi vî rengî ku ji sedî 70 heta 80 yê dîyardeya kampan bi dawî bibe û xelk karibin vegerin gund û bajarokên xwe.
Serok bal kişand ser wê yekê ku pêvajoya jinûveavakirinê dabeşî du rêyan dibe; ya yekem girêdayî bajarên rêkûpêk e ku sektora taybet dikare tê de bi rêya projeyên veberhênanê yên nûjen û li gorî pîvanên avahîsazîyê yên pêşketî beşdar bibe. Rêya duyem jî girêdayî gund û bajarokên gundewar e ku ji bo sektora taybet zehmet e tê de veberhênanê bike.
Serok El-Şeri’ tekez kir ku hewldanên sala borî hinekî belawela bûn û carinan projeyên ji hev cuda dihatin kirin bêyî ku hevahengîyek giştî hebe, lewma wî destnîşan kir ku divê derbasî qonaxa xebata birêkûpêk bibin bi rêya dabeşkirina sektoran û dîyarkirina pêşgavîyan.
Serok El-Şeri’ anî ziman ku komîteyek bi serokatîya Wezîrê Rewşên Awarte û Birêvebirina Karesatan Raid El-Salih hatiye avakirin, ji bo dîyarkirina pêşgavîyan û hevahengîya xebatan di navbera hikûmet û sazîyên civaka sivîl de, da ku çavkanî ber bi nûjenkirina binesazîyê li navçeyên ku herî zêde zîyan dîtine, werin arastekirin.
Wî bal kişand ser wê yekê ku hikûmet xwedîya dane û amaran e ku dê bi rêxistinan re parve bike, bi mebesta aresteya hewldanan ber bi deverên ku hîn kamp lê hene, nexasim li gundewarên Idlib û bakurê Hemayê, û hinek deverên li derdora Helebê, ligel dayîna pêşgavîtîyê ji bo deverên herî zêde zerar dîtine.
Serok El-Şeri’ dîyar kir ku hinek kamp bi derbasbûna demê re veguherîne komelgehên niştecihbûnê yên nîvasayî, lê hinek kampên din hîn bi konan an xanîyên demkî ne di bin sîya wêranbûna tevahî ya gundên resen ên niştecihan, ev yek jî plansazîyeke giştî ji bo jinûveavakirinê dixwaze ku ji deverên herî wêrankirî dest pê bike.
Serok El-Şeri’ tekez kir ku vegerandina xelkê bo deverên wan ne tenê girêdayî nûjenkirina binesazîyê ye, lê belê bernameyeke giştî dixwaze ku xizmetên bingehîn, derfetên kar û piştgirîya aborî li xwe bigire, da ku aramîya niştecihan li deverên wan piştî vegerê misoger bike.
Di dawîya hevdîtinê de, Serok Ehmed El-Şeri’ tekezî li ser giringîya yekkirina sîyasetan û temamkirina hewldanan di navbera hikûmet û sazîyên civaka sivîl de kir, û hêvîya xwe ji bo hevkarîyeke nêzîk di qonaxa bê de anî ziman da ku pêşketineke berçav di dosyaya jinûveavakirinê û vegera koçberan de pêk were.
