Şam-SANA
Serok Ehmed El-Şeri’ tekez kir ku rizgarkirina Sûrîyê xaleke dîrokî ya werçerxanê bû ku dawî li dûrbûna bêhtirî 40 salî anî û dîyar kir ku civaka navdewletî bi dûrketina Sûrîyê ji çarçoveya xwe ya cîhanî zîyaneke mezin dîtiye.
Serok El-Şeri’ di hevpeyvînekê de ligel kanala Amerîkî CBS NEWSê, eşkere kir ku Sûrîyê di salên borî de çavkanîya koçberîyê, navenda pîşesazîya keptagonê, bikaranîna çekên kîmyawî û qada nakokîyên herêmî û navdewletî yên aloz bû.
Derbarê dosyeya bakurrojhilatê Sûrîyê de, Serok El-Şeri’ tekez kir ku peymana 10ê Adarê bi “HSD”ê re xwedî qebûlkirineke gelêrî ya berfireh e û mafên Kurdan di çarçoveya destûra Sûrîyê de misoger dike û her taybetmendîyeke çandî yan civakî ya pêkhateya Kurd dê bi qanûnê were parastin. Serok El-Şeri’ her wiha tekezî li ser redkirina her hewldaneke cudaxwaz kir, xasma ku piranîya niştecihên herêmê ji pêkhateya Ereb in ku girêdayî dewleta Sûrîyê ne û heta di nava civaka Kurd bi xwe de jî lihevkirineke seranserî li ser “HSD”ê nîne.
Serok El-Şeri’ bal kişand ser wê yekê ku “HSD”ê di dema şerê li dijî DAIŞê de bi piştgirîya Amerîkayê û hin welatên rojavayî hate damezirandin, lê piştî ku dewleta Sûrîyê serwerîya xwe ji nû ve bi dest xist, êdî pêwîstî bi hebûna rêxistinên bi vî rengî nemaye. Serok El-Şeri’ dîyar kir ku ev dabeşkirinên leşkerî û ewlehîyê yekîtîya welêt lawaz dikin û gefê li aramîya wî dixwin.
Serok El-Şeri’ anî ser zimên ku ji dema rizgarkirinê ve armanceke zelal hatiye danîn ku çek tenê di destê dewletê de bin û her pirrengîyek di alîyên çekdar de dê bibe sedema nearamîyên ewlehîyê yên navxweyî û dê bandorê li seranserê herêmê bikin.
Serok El-Şeri’ behsa ezmûna xwe ya kesîtî di şerê li dijî rêxistina DAIŞê de kir ku zêdetirî deh salan rûbirûbûnyî wan bû û destnîşan kir ku Sûrîyê îro xwedî ezmûneke berfireh e di têkoşîna li dijî vê rêxistinê de, di nav de birêvebirina dosyeyên hestyar ên wekî Kampa Holê ku ji ber fikrên tundrew ên ku tê de çêdibin, dibe metirsîyeke ewlehîyê ya mezin.
Serok El-Şeri’ eşkere kir ku ne alîyên li bakurrojhilatê welêt lê hikûmeta Sûrîyê alîyê rewa ye ku rasterast bi vê dosyeyê re tev bigere, û ji roja yekem ve ji Amerîkayê û dewletên pêwendîdar re gotiye û bal kişand ser wê yekê ku Sûrîyê dikare van pirsgirêkan bi tena xwe çareser bike.
Serok El-Şeri’ tekez kir ku Sûrîyê dewleta qanûn û hemwelatîbûnê ye, ku hikûmeteke cihêreng ku wezîrên ji hemû pêkhateyên gelê Sûrîyê tê de cih digirin, hatiye avakirin.
