Şam-SANA
Bi serpereştî û amadebûna Serokê Komarê Ehmed El-Şeri’, îro Pêncşemê Pêşangeha Navdewletî ya Pirtûkan a Şamê di gera xwe ya awarte de li Koşka Kongreyan li Şamê hat vekirin. Vekirin bi beşdarîyeke berfireh a fermî û çandî, bi amadebûna hejmarek wezîr, kesayetên sîyasî û ramanwerên Ereb, ligel hin nivîskar û rewşenbîran pêk hat.
Serok El-Şeri’ di axaftina xwe ya merasîma vekirinê de got: “Mirovatîyê her dem hewl daye li dû rastî, zanîn, raz û gencîneyên dinyayê bigere.” Serok El-Şeri’ dîyar kir ku her çiqas zanîna mirov zêde bibe, hişmendîya wî jî zêde dibe û her ku hişmendî zêde bibe, hewcedarîya wî bi zanistê zêdetir dibe.
Serok El-Şeri’ anî ziman ku qanûna dinyayê li ser qencî û xerabîyê ava dibe û zanîn her duyan jî bihêz dike û wiha pê de çû: “Her kesê ku pêşî di gihîştina zanînê de bixebite, serkeftin ji bo wî ye. Emaneta zanistê “kar” e; lewma yê hîn bibe û li gorî zanîna xwe kar neke, zanîna wî dê li dijî wî bibe hincet”.
Serok El-Şeri’ di berdewamîya axaftina xwe de got: “Neteweya nezan bi lawazîyê hatiye girêdan, lê neteweya zana ku li gorî zanîna xwe kar dike, bi hêzê ve hatiye girêdan.” Serok El-Şeri’ amaje pê kir ku Xwedê pirtûka xwe ji bo rêberîya me hiştiye û em li ser fêrbûn, raman û fikirînê han dane û got: “Xwestina qencîyê ji bo mirovan, pêkanîna dadperwerîyê û serxistina heqîyê hêzê dixwaze, lê hêza bê zanist wêranker e û şûrê bê raman xwedîyê xwe dibire”.
Serok El-Şeri’ her wiha got ku: “Şam herdem ronahîya zanistê û kanîya zanînê bû, û xêra wê gihîştiye rojhilat û rojavayê dinyayê, heta ku bûyer li pey hev hatin û “mirovên xerab û fesad” tol jê hildan û xwestin nasnameya wê winda bikin û ronahîya wê vemirînin”.
Serok El-Şeri’ tekez kir ku Şam îro vegerîya, û em jî pê re vegerîyan da ku em hemû bi hev re vê avahîya mezin nû bikin, birînên wê derman bikin û birqîn û şewqa wê lê vegerînin.
Serok Ehmed El-Şeri’ axaftina xwe bi vê hevokê bi dawî kir: “Pêşangeha pirtûkan a îro vegereke pîroz û destpêkeke giranbuha ye piştî rizgarkirina tevahîya Sûrîyê. Xwedê we şa bike û we bi zanîn û zanistê xurt bike.”
Biryar e ku derîyên pêşangehê ji sibe ve ji saet 10:00ê sibehê heta 09:00ê êvarê ji xelkê re vekirî bin.
