Şam-SANA
Piştî serkeftina li hember Tûnisê bi goleke bêberamber di Kûpaya Ereban de ku li Qeterê tê lidarxistin, Serok Ehmed El-Şeri‘ pêwendîyeke telefonî ya vîdyoyî bi şanda Tîma Niştimanî ya Futbolê re encam da. Di pêwendîyê de, Serok El-Şeri’ ji bo vê serkeftina ku kêf û şahî xiste dilê hemû Sûrîyan, pîrozbahî li Tîma Niştimanî ya Sûrîyê kir.
Di pêwendîya xwe ya vîdyoyî de, Serok El-Şeri’ destxweşî li lîstikvanên Tîma Niştimanî ya Sûrîyê kir û wiha ji wan re got: “Ev serkeftin gîyanê îrade û rijdîya we nîşan dide.”
Serok El-Şeri’ tekez kir ku werziş qadeke girîng e ji bo qerebûkirina Sûrîyan ji azar û zîyanên ku di 14 salên borî de dîtin û ragihand ku her gaveke ku tîma niştimanî bi dest dixe, dibe sedemê kêfxweşkirina gelê Sûrîyê û bilindkirina navê Sûrîyê.
Serok El-Şeri’ wiha pê de çû: “We bi vê lîstika xwe ya hêja dilê hemû Sûrîyan xweş û şa kir. Em hêvî dikin beşdarîyeke we ya mezin hebe ji bo ku hûn wan kêfxweştir bikin. Divê hûn himeta xwe xurt bikin û bi deyax bin. Em ê jî ji hêla xwe ve, bi piştevanîya çend welatên ku veberhênana di vî warî de girtine ser xwe, ji bo başkirina binesazîya yarîgeh û otêlên werzişê kar bikin.”
Her wiha Serok El-Şeri’ rahênerê tîmê jî ji bîr nekir û spasîyeke taybet li rahênerê Spanyayî yê tîmê Jose Lana kir û hewldanên wî di birêvebirina tîmê de bilind nirxand. Li dawîyê jî, Serok El-Şeri’ piştrast kir ku karê hevbeş di navbera stafê teknîkî û lîstikvanan de serkeftinan çêdike û hêvîya serkeftinên zêdetir jê re xwest di rêvebirina tîmê de ber bi bidestxistina destkeftên mezintir, nemaze gihîştina Kûpaya Cîhanê.
Ji alîyê xwe ve, endamên Tîma Niştimanî ya Sûrîyê spasîya xwe ji El-Şeri’ re ji bo vê destpêşxerîya wî nîşan dan û tekezî li ser vîn û rijdîya ji bo bidestxistina destkeftên goga pê yên siberojê kirin.
Tîma Niştimanî ya Sûrîyê ya mêran a futbolê duh Duşemê dest bi rêwîtya xwe di Kûpaya Ereban de kir ku li Qeterê tê sazkirin, bi serkeftina li ser Tûnisê bi goleke bêberamber di lîstika ku li Yarîgeha Ehmed Bin Elî li Dohayê hat lidarxistin. Lîstikvanê navdar Omer Xirêbîn di xuleka 49an de gola Tîma Niştimanî ya Sûrîyê tomar kir.
