New York-SANA
Nûnerê Daîmî yê Sûrîyê li Neteweyên Yekbûyî Îbrahîm Ulebî tekez kir ku daxuyanîyên dawî yên Îsraîlê ku tê de radigihîne ku ew dê qet ji axa Sûrîyê venekişe, cihê nîgeranîyê ne; di demekê de ku Dewletên Yekbûyî yên Amerîkayê bi rêveberîya Serok Donald Trump navbeynkarîyê di navbera Sûrîye û Îsraîlê de dike.
Ulebî di rûniştineke Encumena Ewlekarîyê ya Neteweyên Yekbûyî de, duh Pêncşemê, dîyar kir ku daxwaza Sûrîyê ji bo zêdekirina fînansekirina Hêza Çavdêrîya Veqetandina Pevçûnan a Neteweyên Yekbûyî xwedî wateyên girîng e. Dewleta ku li pey pevçûnê be, daxwaza çavdêrîya tund li ser peymana veqetandinê nake, di heman demê de Îsraîl li gorî raporên ku ji Encumena Ewlekarîyê re hatine pêşkêşkirin, binpêkirina peymana 1974an berdewam dike.
Ulebî got: “Şênîyên deverên ku Îsraîl derbasî wan bûye, nikarîbûn di 8ê Kanûna Yekem de tevî Sûrîyan û cîhanê hilweşîna rejîmeke hovane pîroz bikin.” Wî destnîşan kir ku ev gilîyekî dubare bû di dema serdana wî bo wan deverên ku milkê gelê Sûrîyê ne.
Ulebî da zanîn ku Sûrîya îro yek ji welatên herî aram e li herêmê, mijûlî avakirina welat, vegerandina sazîyan û kişandina veberhênanan e. Her wiha bi hevkarên navdewletî re di şerê li dijî terorê û pabendbûnên têkildarî çekên kîmyewî û bihêzkirina ewlehîya herêmî de hevkarîyê dike.
Ulebî li dawîyê jî got: “Guhertina li Sûrîyê ku dixuye Îsraîl jê ditirsîya, nemana rejîmeke dîktator bû ku çekên kîmyewî li dijî gelê xwe bi kar anî. Gelo Îsraîlê baştir didît rewşa ku di serdema Esed de hebû, bimîne?”
