Cenevre-SANA
Wezîra Kar û Karûbarên Civakî Hind Qebewat tekez kir ku Sûrîye dil heye ku hevkarîyên rasteqîn bi hevkarên xwe yên navdewletî re pêk bîne, ku di bihêzkirina sazîyên piştgirîya başbûna domdar de beşdar bibin û rêzê li milkîyeta Sûrîyan a siberoja wan bigirin. Her wiha destnîşan kir ku veguhertina rasteqîn bi radeya rengvedana wê li ser jîyana welatîyan tê pîvandin.
Wezîr Qebewat, di gotarekê de ku di dema beşdarbûna xwe di karên gera 114emîn a Kongreya Kar a Navdewletî ku li Cenevreya Swîsreyê hat lidarxistin de pêşkêş kir, got: “Sûrîye serwerîya xwe gav bi gav ji nû ve ava dike, û pêwîstîya wê bi hevkarên wisa heye ku wekî dewleteke ku dikare beşdarîyê di aramî û geşepêdanê de li ser astên herêmî û navdewletî bike lê binêrin, ne tenê wekî rewşeke mirovî.”
Qebewat amaje bi wê yekê jî kir ku dîroka Sûrîyê wê yekê nîşan dide ku gelê Sûrîyê gava derfet jê re peyda bibin dikare çi bi dest bixe, û bal kişand ser wê yekê ku welat heta dawîya pêncîyên sedsala borî şahidîya yek ji yekemîn pêlên pîşesazîyê li cîhana Erebî kiriye, nemaze di sektorên rêsesazî, çîmento û pîşesazîyên xurekê li bajarê Heleb û Şamê, ligel bazareke pişkan (bors) a geşbûyî û bawerîyeke berfireh bi aborîya niştimanî.
Wezîr Qebewat tekez kir ku ew nermbûna ku bazara kar a Sûrîyê di wê qonaxê de pê dihat naskirin, heta îro jî amade ye.
