Şam-SANA
Serok Ehmed El-Şeri’ îro Duşemê bi rêya vîdyo-konferansê beşdarî civînekê bû ligel hejmarek serokên welatên Rojhilata Navîn, li ser vexwendina Serokatîya Encumena Ewropî û Komîsyona Ewropî, bi mebesta gotûbêjkirina geşedanên leşkerî li herêmê û rêyên kêmkirina rageşîyê û piştgirîkirina rêyên dîplomatîk.
Serok El-Şeri’ di gotarekê di dema civînê de got: “Rageşîya vêga gefeke hebûnê li ser tevahîya herêmê nîşan dide; girtina Tengava Hurmizê û lêdana binesazîya enerjîyê li Kendavê gefê li aramîya aborî ya cîhanê dixwe.”
Serok El-Şeri’ dîyar kir ku Sûrîye ku li ser xaçerêyeke cografî di navbera sê enîyên pêketî de ye, rastî encamên rasterast û metirsîdar tê ji ber van geşedanan. Wî tekez kir ku helwesta Sûrîyê her wekî xwe maye di şermezarkirina hemû cureyên êrîşên ku serwerîya Erebî dikin armanc.
Serok El-Şeri’ her wiha got: “Ew hewldanên Îranî yên berdewam ji bo têkdana aramîya paytextên Erebî û destwerdanên ku dest didin dilê ewlehîya neteweyî ya Erebî, bi tundî têne şermezarkirin.” Wî piştrast kir ku aramîya Sûrîyê hîmê bingehîn ê aramîya Rojhilata Erebî û herêmê ye.
Serok El-Şeri’ di berdewamîya axaftina xwe de got: “Me helwesta xwe ya yekgirtî ligel welatên herêmê saz kir. Me wekî tevdîrekê hêzên xwe yên berevanîyê li ser sînor xurt kirin da ku rê li ber derbasbûna encamên şer bo nav axa Sûrîyê bigirin, û ji bo rûbirûbûna rêxistinên sînorbir û rêgirtina li wan ku axa Sûrîyê bikar bînin.”
Li dawîyê jî, Serok El-Şeri’ piştgirîya xwe ji bo gavên cidî û biryardar ên hikûmetên Iraq û Libnanê anî ziman da ku metirsîyê ji welatên xwe dûr bixin û rê li ber her şemitîneke ber bi şer ve bigirin. Her wiha piştgirîya xwe ji bo Serokê Libnanê Jozef Ewn di bêçekkirina Hizbullahê de nîşan da.
