Enqere-SANA
Serokkomarê Tirkîyê Receb Tayyîp Erdogan tekez kir ku Sûrîye di bin serokatîya Serok Ehmed El-Şeri’ de, di mehên borî de ber bi aştîya mayînde, aramî û werara aborî ve pêşketineke berbiçav bi dest xistiye û got: “Em bawer dikin ku ev pêvajo dê bi rakirina sizayan lezgîntir bibe.”
Erdogan di civîneke çapemenîyê de bi Şêwirmendê Alman Friedrich Merz re duh li Enqereyê, tekez kir ku bextewarî û xweşhalîya gelê Sûrîyê tevî parastina yekîtî û yekparçeyîya axa wê ji bo Tirkîyê karê herî li pêş e û destnîşan jî kir ku Almanya giranîyê dide xebata bi Tirkîyê re ji bo hevahengîya di derbarê rewşa Sûrîyeyê de.
Derbarê rewşa Xezeyê de, Serokkomarê Tirkîyê daxwaz kir ku dawî li qirkirin û birçîkirina domdar were anîn ku Îsraîl wek çekekê li dijî Filistînîyan li Xezeyê bi kar tîne. Erdogan destnîşan kir ku çareserîya du dewletan kilîda aştîya mayînde li herêmê ye.
Derbarê şerê Rûsya û Ukraynayê de, Erdogan anî ziman ku welatê wî giranîyeke mezin dide berdewamîya hewldanên dîplomatîk ji bo gihîştina çareserîyeke adilane û mayînde ji vî şerî re.
Ji hêla xwe ve, Şêwirmendê Alman tekez kir ku Tirkîye di hemî mijarên sîyaseta derve û ewlehîyê de welatekî pir girîng e û got: “Em ê ji bo xurtkirina hevkarîyê bi Tirkîyê re di warê polîtîkayên ewlehîyê de kar bikin û em dixwazin Tirkîyê di Yekîtîya Ewropayê de bibînin.”
Serokomarê Tirkîyê û Serokwezîrê Brîtanyayê Keir Starmer di civîneke çapemenîyê de li Enqereyê di 27ê vê mehê de tekez kiribûn ku pêkanîna aramîya mayînde li Sûrîyê dê tenê bi piştgirîya hikûmeta wê pêkan be.
