Waşington-SANA
Lêkolîneke zanistî ya nû eşkere kir ku pabendîya bi rûtîneke rojane ya birêkûpêk dibe ku di kêmkirina êşa laşî û baştirkirina rewşa derûnî de bibe alîkar, nexasim li nik kesên danemir ên ku ji bêxewîyê dinalin.
Her wiha bal kişand ser wê yekê ku dîyarkirina demên hişyarbûn, xwarin, çalakîya civakî û xewê bi baştirbûna tenduristîya giştî ve girêdayî ye.
Li gorî tiştê ku malpera zanistî “ScienceDaily”ê duh Pêncşemê ji ser zimanê lêkolînerên li Zanîngeha Missouri-Columbia ya Amerîkî belav kiriye, lêkolîna ku di kovara “Behavioral Medicine” (Bijîşkîya Reftarî) de hatiye weşandin, nîşan da ku birêkûpêkîya şêwazên rojane bi kêmbûna astên êşê û nîşaneyên depresyonê re li nik kesên danemir girêdayî ye, her wiha li nik wan kesên ku xeweke baş bi dest naxînin jî.
Lêkolîna ku ji alîyê Eunjin Tracy, mamosteya alîkar di Fakulteya Perwerde û Geşepêdana Mirovî de li zanîngehê hatiye birêvebirin, 67 kesên danemir girtin nav xwe ku 37 ji wan ji bêxewîyê dinalîyan, bi armanca lêkolînkirina têkilîya di navbera tevlîhevîyên xewê, rûtîna rojane û tenduristîya laşî û derûnî de.
Encaman dîyar kir ku kesên ji bêxewîyê dinalîyan bêtir di bin rîska hîskirina êşê û derketina nîşaneyên depresyonê de bûn, lê beşdarên ku bernameyeke rojane ya dîyarkirî dişopandin, astên kêmtir ên êş û depresyonê tomar kirin, bêyî ku li kalîteya xewa wan bê nihêrtin.
