Şam-SANA
Wezareta Derve û Koçberan duh Şemîyê ezmûna nivîskî ji bo serlêderên pêşbirka dagirtina çend valahîyên kar li wezaretê pêk anî; 2737 serlêderên fakulteyên zanist û hiqûqê yên Zanîngeha Şamê beşdarî ezmûnê bûn.
Ezmûna serlêderên pêşbirka valahîyan armanc dike ku kêrhatîyên Sûrîyê bikişîne û kar li gorî pîvanên şefafîyet û wekhevîya derfetan pêş bixe, bi awayekî ku di avakirina dezgeheke bêhtir bikêr û çalak de bibe alîkar.
180 pirsên curbicur
Rêveberê Rêveberîya Pêşveçûna Îdarî li Wezareta Derve û Koçberan Hesan Cuneydî di daxuyanîyekê de ji peyamnêra SANAyê re dîyar kir ku hejmara serlêderên ji bo pêşbirkê ji 7265 kesan ji parêzgehên curbicur derbas bû, ku nêzîkî 3586 kes di qonaxa destpêkê de hatin hilbijartin, berîya ku 2735 serlêder ji bo derbasbûna vê ezmûna niha werin qebûlkirin.
Her wiha Cuneydî destnîşan kir ku serlêder di vê qonaxê de derbasî ezmûneke nivîskî ya bi sîstema pir-vebijêrik bûn. Tê de, 180 pirsên curbicur hebûn.
Ji alîyekî din ve jî, wî da zanîn ku komîteyeke pênc-alî ya pejirandî serpereştîya qonaxên curbicur ên pêşbirkê dike û pîvanên wê datîne. Girêdayê nivîsîna pirsan, komîteyeke zanistî ku mamosteyên ji çendîn zanîngehên Sûrîyê li xwe digire, amadekirina pirsên vê ezmûnê girtîye ser xwe.
Armanca pêşbirkê hilbijartina 200 serlêderî ye
Rêveberê Rêveberîya Pêşveçûna Îdarî li wezaretê da xuyakirin ku serlêder dê piştî vê qonaxê, derbasî hevdîtina devkî bibin û li pey wê jî qonaxa temamkirina belgeyên fermî yên pêwîst tê, da ku di dawîya qonaxên pêşbirkê de, 200 serlêder werin hilbijartin.
