Şam – SANA
Sazîya Giştî ya Bîmeya Civakî ragihand ku ji destpêka îsal ve li parêzgehên cuda yên welêt 247 rûdanên birîndarbûna li ser kar û 30 nexweşîyên pîşeyî hatine tomarkirin.
Sazîyê da zanîn ku piranîya van birîndarîyan li Parêzgeha Gundewarê Şamê qewimîne, ku sedema wê jî zêdebûna kargeh û navendên pîşesazîyê ye li vê herêmê.
Sazîyê îro Şemîyê li ser kanala xwe ya Telegramê eşkere kir ku ew dosyayên birîndarîyên kar û nexweşîyên pîşeyî li gorî rêkarên destnîşankirî dişopîne û çareser dike.
Her wiha bal kişand ser wê yekê ku hinek dosya hêj di qonaxa temamkirinê de ne, ji ber ku hewcedarîya wan bi raporên bijîşkî, yên tîşkdar û belgeyên fermî yên ji hêla alîyên tenduristîyê yên pêwendîdar ve heye.
Sazîyê dîyar kir ku rêkarên çareserkirinê bi tomarkirina birîndarîyê li Rêveberîya Birîndarîyan dest pê dikin; piştre pişkînerên saxlemî û ewlehîya pîşeyî rewşê dişopînin û lêkolînê li ser şert û mercên rûdana wê dikin.
Ev şopandin hem wan rûdanên di dema kar de diqewimin û hem jî yên di dema çûnûhatina ser kar de li xwe digire, bi mercê ku kes ji rêya xwe ya asayî derneketibe.
Hat destnîşankirin ku piştî temamkirina belgeyan, dayîna biryara dawî û dîyarkirina rêjeya kêmendambûnê, mafên yasayî yên kesê birîndar çi mûçe be yan jî sîgorte ji alîyê rêveberîya peywendîdar ve tên dayîn, piştî ku ji alîyê Dezgeha Çavdêrîya Darayî ve bên pesendkirin.
