Laziqîye – SANA
Berhema zeytûnan yek ji çavkanîyên aborî yên herî berbiçav e ku cotkarên parêzgeha Laziqîyê ji bo dabînkirina debara jîyana xwe, pişta xwe pê girê didin. Li kêleka wê jî derfetên kar ên demsalî û berfireh di dema jêkirinê de peyda dike.
Ligel destpêkirina vî werzî, hêvîyên cotkaran yên berhevkirina berhemeke pir hene ku derfetê bide wan lêçûnên berhemanîna zeytûnan qerebû bikin û dahateke madî ji pey bi dest bixin ku alîkarîya wan di berdewamkirina karê çandinîyê de bike; nexasim li hemberî dijwarî û astengîyên zêdebar yên girêdayî bilindbûna bihayên pêdivîyên berhemanînê û xizmetên çandinîyê.
Berhemeke pir.. û rêjeyeke kêmtir ya zeytê
Di hin hevdîtinan de ku nûçegihanê SANAyê ligel hejmarek cotkarên devera Kirsanayê li gundewarê parêzgehê pêk anîn, cotkar Malik Ehmed El-Cirdî dîyar kir ku berhema zeytûnan ya îsal gelekî pir û zêde ye, û bi çend caran li berhema werzê bihurî ye.
El-Cirdî da zanîn ku pirbûna berhemê li şert û mercên avhewayê yên guncaw û qaseyên baranê yên têrker vedigere ku di avdana daran û başkirina hilbirîna wan de alîkar bûn.
Her wiha El-Cirdî amaje pê kir ku rêjeya zeytê ya ku di dema guvaştinê de bi berheman dikeve, hîn jî ji astên werzê bihurî kêmtir e; ew jî ji ber berîya ku zeytûn xweşik bigihin, dest bi berhevkirina wan kirine.
Wekî din hêvîya xwe anî zimên ku berhem bi bihayên guncaw were firotin da ku cotkar bikarin lêçûnên pêdivîyên berhemanînê yên bilind, qerebû bikin.
