Şam – SANA
Wezareta Dadê ya Sûrîyê tekez kir ku ew agahîyên di hin torên civakî de li ser dadwerê ji kar dûrxistî Mazin Meyhûb hatine belavkirin, xasma nûçeyên derbarê derketina biryara bêgunehîya wî, ne rast in û hemû alîyên yasayî yên dozê nîşan nadin.
Wezaretê di daxuyanîyekê de ku duh Çarşemê kopîyek jê gihîştiye ajansa SANAyê dîyar kir ku kesê navborî di gelek dozan de tometbar e; di hin dozan de hatiye darizandin û ji ber sûcê qumarê ceza lê hatiye birîn, lê sûcê “reftarên li dijî exlaqê giştî” li ser nehatiye selmandin.
Her wiha lêpirsînên dadwerî di çend dozên din de li cem dadwerê lêkolînê yê pispor berdewam dikin û ew ji ber van pêvajoyan hîn di girtîgehê de girtî ye.
Wezaretê destnîşan kir ku ji bo parastina duristîya agahîyan û rêzgirtina li prensîba bêgunehîyê (ku kesek bêguneh e heta sûcê wî neyê îsbatkirin), pêşkêşkirina rastîyên yasayî divê pişta xwe bispêre biryarên dezgehên dadwerî yên peywendîdar; her wiha ferz e mirov cudahîyê bixe navbera wan dozên ku biryar li ser wan derketiye û wan dozên ku hîn di qonaxa lêpirsîn an darizandinê de ne.
Her wiha da zanîn ku tu girêdaneke neçarî di navbera berpirsyarîya pîşeyî û berpirsyarîya cezayî de nîne; ji ber ku çarçove, bingeh û rêkarên her yekê ji ya din cuda ne. Dibe ku binpêkirineke pîşeyî were selmandin û cezayê wê yê pîşeyî li pey bê, tevî ku ji bo heman karî berpirsyarîyeke cezayî li ser nehatibe çespandin jî.
Wezaretê dupat kir ku rêkarên di vê dozê û dozên din de hatine wergirtin, di çarçoveya bicihanîna yasa û qanûnan, xurtkirina çavdêrî û lêpirsînê û misogerkirina birêveçûna dadmendîyê li gorî pîvanan bêyî tu alîgirî û cudakarîyê ne; bi vî rengî mafên hemû alîyan tên parastin û serxwebûn û rûmeta dadwerîyê tê parastin.
