Hims-SANA
Wezîrê Ewqafê Mihemed Ebû El-Xêr Şukrî, îro Pêncşemê, Mizgefta El-Dalatî li bajarê Himsê piştî jinûveamadekirin û nûjenkirina wê, vekir, bi awayekî ku rê li ber vegera nimêjkeran vedike û rola wê ya îmanî û zanistî zindî dike.
Karên nûjenkirinê minareya şûnwarî ya ku xwedî teşeyekî heştgoşeyî ye, û amadekirina qata yekem û sazîyên xizmetguzarîyê yên ku zirar dîtine li xwe girt.
Şukrî di daxuyanîyekê de ji nûçegihanê SANAyê re piştrast kir ku girîngîya jinûvevekirina mizgeftê di wê yekê de ye ku yek ji mizgeftên şûnwarî yên kevnar ên Himsê ye. Her wiha bal kişand ser wê yekê ku geşta wî ya li parêzgehê vekirina Amadeyîya Şer’î ya Komeleya Zanayan li Himsê û agahdarbûna li ser çalakîyên xelekên Quranê jî li xwe girt.
Îmam û gotarbêjê mizgeftê Enes Cinêd El-Ke’ke di daxuyanîyeke hevşêwe de dîyar kir ku Mizgefta El-Dalatî yekemîn mizgeft e ku li derveyî surê Himsa kevn hatiye avakirin, û yekane mizgeft e di nav bazara bajêr de. Her wisa ji ber hebûna Peymangeha Zanistî ya Şer’î tê de ku hejmarek ji zanayên bajêr jê derçûne, ew cihê serdana zana, şêx û xwendekarên zanistê yên Himsê bû.
Mizgefta El-Dalatî yek ji dergeh û xemlên Îslamî û şûnwarî ye li taxa El-Himêdîyê, ku di sala 1881ê de li ser erdeke weqfê ya girêdayî Mizgefta El-Nûrî ya Mezin hatiye avakirin. Ev mizgeft berê bi her du navên “Mizgefta Siltan Ebdilhemîd” û “Mizgefta El-Dek” dihat naskirin, berî ku navê “Mizgefta El-Dalatî” hilgire ku vedigere avakerê wê Hac Husên El-Dalatî.
