Şam-SANA
Serokê Dadgeha Destûrî ya Bilind Dr. Îsam El-Xilêf tekez kir ku dadgehê di civîna xwe ya yekem de, dest bi lêkolîna reşnivîsa projeyasaya rêkxistina karê xwe kiriye.
Ev reşnivîs ji alîyê komîteyeke qanûnî ve ku ji hêla Serokkomarîyê ve hatibû erkdarkirin hatibû amadekirin, da ku rêkarên derçûna wê werin temamkirin û mekanîzma kar û desthilatên dadgehê werin rêkxistin.
Dr. El-Xilêf di daxuyanîyekê de ji bo SANA îro Sêşemê ragihand: “Projeyasa çarçoveya qanûnî ya birêvebirina desthilatên destûrî yên dadgehê pêk tîne, nemaze di warê çavdêrîkirina li ser destûrîbûna qanûn, projeyasa û pêşnîyaran; ev yek jî rêgeza serwerîya destûrê xurt dike û misoger dike ku hemû zagon bi bendên Danezana Destûrî re guncaw bin.”
Navborî her wiha da zanîn ku dadgeh çavdêrîya xwe ya li ser destûrîbûna zagonan bi du awayan pêk tîne: Çavdêrîya pêşwext (berî pesendkirinê) û ya paşwext (piştî pesendkirinê).
Dr. Îsam El-Xilêf dîyar kir ku çavdêrîya paşwext bi biryarên yekalîker û dawî yên ku mafê îtirazê lê tuneye bi dawî dibe û ev biryar ji bo hemû desthilatên dewletê neçarî ne. Lê belê çavdêrîya pêşwext li ser daxwaza pêşkêşkirina nêrînekê derbarê destûrîbûna projeyasa û pêşnîyaran berî pesendkirina wan tê kirin; di vê qonaxê de nêrîna dadgehê di koka xwe de ne neçarî ye, lê guhnedana vê nêrînê dibe ku bibe sedema ne-destûrîbûna teksta zagonî û di paşerojê de heke li gorî qanûnê îtiraz lê were kirin, bibe sedema betalkirina wê.
