Şam – SANA
Wezareta Rewşên Awarte hişyarî da ku pêleke nizmefişarên baranê yên dijwar dê parêzgeha Hesekê û tevahîya welat bigire. Tê pêşbînîkirin ku rêjeya baranê bigihîje 40 heta 70 mîlîmetreyî û leza bayê di rojên Pêncşem û Înê de bigihîje 80 kîlometreyan di saetê de. Wezaretê bang kir ku welatî di asta herî bilind de ya hişyarîyê de bin.
Rêveberîya Hişyarîya Pêşwext bang li welatîyan kir ku pabendî rênimayên xweparastinê bin:
- Ji bo malên nêzîkî çeman, ji ber tirsa bilindbûna asta avê tedbîrên pêwîst werin girtin.
- Ji gelî û herêmên nizm dûr bikevin.
- Di ser tu rûbar an kanîyên avê re derbas nebin, çi qas asta avê nizm xuya bike jî xwe nehavêjin xeterîyê.
- Di wan rêyên ku di bin avê de mane de nemeşin.
- Di rêyên çandinîyê de nemeşin.
- Ji bo rêgirtina li şimitîn û ketinê, nêzîkî cihên herikîna avê nebin.
- Zarok, kal û pîr, jin û kesên xwedî pêdivîyên taybet ji nêzîkbûna li golan biparêzin.
- Ji bo wênekişandinê yan jî temaşekirina golan xwe nehavêjin xeterîyê û nêzîkî wan nebin.
- Dema herikîna avê dijwar bibe, ji pirdên li ser rûbaran dûr bikevin.
- Bi wesayîtan di ser pirdan re derbas nebin û xwe di nav golan de nehavêjin xeterîyê.
- Wesayîtên xwe li herêmên nizm yan jî nêzîkî cihên herikîna avê ranegirin.
- Di dema bahozên birûskê de telefonên mobîl bi kar neynin.
- Di dema bahozan de li nêzîkî daran û stûnên elektrîkê ranewestin.
- Ji dîwar û avahîyên qelişî yên ku dibe ku biherifin, dûr bikevin.
- Ew tiştên ku dibe ku bi bayê bifirin, li cîhên wan qayîm bikin.
- Di dema barana dijwar de leza ajotinê kêm bikin.
- Zarokan li nêzîkî avê an li herêmên nizm bê çavdêrî nehêlin.
- Çenteyê rewşa awarte amade bikin ku tê de belgeyên fermî, dermanên bingehîn, çira, batarî, av, xwarina hişk û şîrê zarokan hebe.
- Di dema metirsîyê de, zarok, nexweş û kal û pîran zû ber bi cihên ewle û bilind ve veguhêzin.
- Kopyên raporên pizîşkî û reçeteyên dermanan li ba xwe biparêzin.
- Rê nedin ku zarok û nexweş bi ava qirêj re têkilîyê deynin.
- Amûrên germkirinê û kincên hişk dabîn bikin, da ku pileya germahîya laş kêm nebe.
- Rewşa tenduristîyê bişopînin û dema hewce bike serî li navenda pizîşkîyê ya herî nêz bidin.
- Alîkarîya cîran û kal û pîran bikin û ji silametîya wan piştrast bin.
- Piştî vekişîna avê, bala xwe bidin çalan û zirarên ku gihîştine rê û binesazîyê.
