Şam-SANA
Îro Duşemê di konferanseke çapemenîyê de damezrandina “Zanîngeha Niştimanî ya Zanistên Parastinê” hat ragihandin. Ev zanîngeh dê 4 kolejên sereke û peymangehekê li xwe bigire. Ev yek bi amadebûna endamên Komîteya Amadekirina Pêşnîyara Zanîngehê pêk hat.
Endamê Desteya Şêwirmendîyê li Wezareta Parastinê Lîwa Selîm Îdrîs di konferansê de got: “Zanîngeha Niştimanî ya Zanistên Parastinê ji bo xebatên zanistên leşkerî yên bilind hatiye terxankirin. Ew ligel her sê kolejên şer, Koleja Zanistên Mirovî û Îdarî û Peymangeha Bilind a Zanistên Teknîkî û Teknolojîyê li xwe digire.”
Lîwa Idrîs anî ziman ku kolej dê efserên endezyarên şer û efserên zanîngehî ji bo xebata di nava Hêzên Çekdar de li gorî pêdivîyan perwerde bikin.
Peymangehên teknîkî yên leşkerî jî dê efserên pilebilind di asta peymangehên navîn û teknîkî de perwerde bikin da ku di yekîne û rêveberîyên Artêşa Sûrîyê de bixebitin.
Wî destnîşan kir ku Akademya Leşkerî ya Bilind sazîya herî bilind a perwerdeya leşkerî ye, û xebatên stratejîk li zanîngehê armanc dikin ku fermandarên leşkerî û sivîl ji bo wergirtina postên serkirdayetîyê û yên stratejîk ên bilind amade bikin.
Lîwa Idrîs dîyar kir ku kolejên di nava Akademya Leşkerî ya Bilind de ev in: Koleja Parastina Niştimanî (ji bo amadekirina serkirdeyên bilind di sazîyên dewletê û hêzên çekdar de), Koleja Şer a Bilind (ji bo perwerdekirina fermandaran ji bo birêvebirina operasyonên leşkerî) û Koleja Fermandarî û Erkanê (ji bo amadekirina efseran ji bo postên fermandarîyê).
Her wiha eşkere kir ku xwendekarên zanîngehê dê bi pileya “Mulazim” derbiçin, û pileyên leşkerî dê piştre li gorî salên xizmetê bin. Kolejên zanîngehê dê bawernameya lîsansê bidin û derfeta xwendina bilind (Master û Doktora)yê peyda bikin.
Lîwa Îdrîs tekez kir ku zanistên leşkerî yên pispor li zanîngehê dê li gorî nûtirîn destkeftên artêşan di warê zanist û teknolojîyê de bin, bi armanca perwerdekirina efserên endezyar ên şer û efserên endezyar ên zanîngehan.
Endezyarên balafirvanîyê bi beşên cuda
Ji alîyê xwe ve, Serokê Peymangeha Bilind a Zanistên Teknîkî û Teknolojîyê Dr. Mihemed Wail El-Xalid got: “Koleja Şer a Esmanî dê endezyaran di şaxên cuda yên balafirvanîyê de perwerde bike.”
El-Xalid got ku Koleja Şer a Deryayî dê endezyarên deryayî û Koleja Şer a Bejayî jî dê hemû şaxên bejayî li xwe bigire, wek:
- Komputer, ragihandin, endezyarîya pîşesazî, mekanîk, elektrîk, mekatronîk, endezyarîya nexşerê û nîşanê, ligel Koleja Werzişê.
- Koleja Zanistên Mirovî û Îdarî: Birêvebirina parastinê, birêvebirina karsazîyê, têkilîyên navneteweyî, dîrok, cografya û zimanan.
- Peymangehên Teknîkî yên Leşkerî: Alîkarê endezyaran perwerde dikin, wekî peymangehên Wezareta Xwendina Bilind.
El-Xalid dîyar kir ku xwendekar li gorî “Mufadeleya” (pêşbirka xalan) ya ku Wezareta Xwendina Bilind amade dike têne wergirtin, û ji bo her kolejekê ezmûneke tenduristî ya taybet heye.
Di sala yekem de waneyên giştî (Matematîk, Fîzîk, Kîmya û Ziman) têne dayîn û di sala duyem de şax têne dîyarkirin.
Navborî axaftina xwe wiha qedand: “Di sala yekem a wergirtina xwendekaran de, wane giştî ne û giranîyê didin ser zanistên bingehîn wekî matematîk, fîzîk, kîmya û zimanan, û di sala duyem de şax (pisporî) dest pê dike”.
