Şam-SANA
Mezlûm Ebdî, îro Sêşemê ragihand ku erkê Hêzên Sûrîya Demokratîk (HSD) bi dawî bûye û wekî hêzeke leşkerî ya serbixwe hatiye hilweşandin.
Ev biryar piştî temamkirina pêvajoya tevlîkirina hêzên HSDê di nav lîwayên Artêşa Sûrîyê de hat dayîn.
Ebdî piştrast kir ku ev pêngav di çarçoveya derbasbûna ber bi qonaxeke nû de tê ku sernavê wê aştî, aramî û avakirina Sûrîyeke nû ye.
Ebdî, di civîneke çapemenîyê de ku li Koşka Gel li Şamê hat lidarxistin, got: “Welat derbasî qonaxeke nû bûye ku navnîşana wê aştî û avakirina Sûrîyê ye.”
Mezlûm Ebdî destnîşan kir ku li ser bingeha lihevkirina bi Serok Ehmed El-Şeri’ re û piştî temamkirina karên entegrasyona hêzan di nav lîwayên Artêşa Sûrîyê de, îro bi awayekî fermî bidawîhatina erkê Hêzên Sûrîya Demokratîk û hilweşandina wê wekî sazîyeke leşkerî ya serbixwe radigihînin.
Ebdî axaftina xwe wiha berdewam kir: “Em dixwazin ev roj bibe destpêka veguhastineke rastîn; ji qadên şer ber bi qadên avakirinê ve û ji serdema çekan ber bi serdema aştîyê ve.”
Wî her wisa dupat kir ku fedakarîyên şehîdan dê her dem di wijdanê wan de zindî bimînin.
Derbarê perwerdeya bi zimanê Kurdî, Ebdî ragihand: “Serok El-Şeri’ di çend boneyan de parastina mafê me yê perwerdeya bi zimanê Kurdî ragihandibû. Me derbarê mafê perwerdeya bi zimanê Kurdî û pêşxistina vê biryarê helwesteke vekirî dît”.
Mezlûm Ebdî anî ziman ku dê îsal xebat li ser cîbicîkirina biryara perwerdeya bi zimanê Kurdî were kirin da ku di siberojê de bibe bingehek ji bo geşedanên dîtir.
Navborî axaftina xwe wiha bi dawî kir: “Em dixwazin Sûrîyeke nû ji bo hemû welatîyên wê ava bikin; Kurd, Ereb, Tirkmen û Aşûrî. Sûrîyeke yekgirtî û aram ku paşeroja nifşên xwe biparêze û jîyaneke birûmet ji bo hemû Sûrîyan misoger bike.”
Temamkirina pêvajoya tevlîbûnê, pêngaveke sereke ye ber bi yekkirina sazîyên dewleta Sûrîyê û vegerandina rola wê ya tam li bakur û rojhilatê welat.
Ev yek bi rêya bidawîhatina pêkhateyên leşkerî û îdarî yên paralel ên ku di salên şoreşê de derketibûn holê pêk tê.
Ev pêngav dê bibe sedema çalakkirina rêveberî û sazîyên hikûmetê û girêdana herêmê bi parêzgehên din re di çarçoveyeke îdarî, dezgehî û aborî ya yekgirtî de.
