Şam-SANA
Wezareta Navxwe derbarê teqîna terorîstî ya ku duh Pêncşemê piştî nîvro qehwexaneyek li Kolana El-Nesir a nêzî Koşka Dadwerî li Şamê kiribû armanc, daxuyanîyek belav kir.
Wezaretê zelal kir ku teqîn saet sêyê piştî nîvro, nêzîkî 70 metreyan li alîyê rojavayê Koşka Dadwerî rû da, û di encamê de 9 welatî şehîd bûn û 20ên din jî birîndar bûn, ji bilî zîyanên madî li cihê tawanê.
Wezaretê dîyar kir ku rêkar û lêkolînên destpêkê nîşan dan ku teqîn ji ber bombeyeke vedayî ya destçêkirî ya bi giranîya nêzîkî kîlogramekê pêk hatiye, ku bi perçeyên metalî hatibû amadekirin, ev jî bû sedema birîndarîyên giran û zirarên mezin li cihê bûyerê.
Wezaretê lê zêde kir û got: Wê tavilê piştî teqînê kembereke ewlehîyê li dora cihê teqînê danî, û tîmên endezyarîyê û kûçikên polîs (K9) operasyonên lêgerîn û paqijkirinê yên hûr pêk anîn da ku piştrast bin ku tu gefên din li herêmê tunene.
Wezaretê bal kişand ser wê yekê ku tîmên berhevkirina belgeyan li Birêveberîya Lêkolînên Tawanan yekser piştî teqînê dest bi karên xwe kirin; wan belgeyên tawanê berhev kirin, li tomarên kamerayên çavdêrîyê vegerîyan, û gotinên şahidan û kesên li derdora bûyerê amade bûn girtin, ev hemû di çarçoveya lêkolînên bi armanca eşkerekirina hûrgilîyên tawanê, û dîyarkirina nasnameya kiryarên wê û her kesê li pişt wê ye.
Her weha wê tekez kir ku lêkolîn hîn berdewam in, û destnîşan kir ku her pêşhateke nû yan encam, dê bi rêya kanalên fermî yên Wezareta Navxwe yekser piştî piştrastkirina wan werin ragihandin.
Wezaretê bang li welatîyan û dezgehên medyayê kir ku li dû gotegotan nekevin û zanyarîyên nepiştrastkirî belav nekin, û daxuyanîyên fermî yên wezaretê wekî çavkanîya pejirandî ya zanyarîyên têkildarî vê dozê bingeh bigirin.
