Şam-SANA
Serok Ehmed El-Şeri’ tekez kir ku zêdekirina mûçeyan a niha ne ya dawî ye, tevî ku rêjeyên bilindkirina heqdestên karmendên hikûmetê gihîştine astên qebûlkirî. Her weha dîyar kir ku ji dema rizgarbûnê ve giranî li ser jinûveavakirina dewletê, çespandina ewlehîyê û avakirina aborîyê bûye di heman demê de.
Serok El-Şeri’ di dema hevdîtina xwe ya ligel şandeyeke rîspî û xelkê parêzgeha Helebê de duh Çarşemê, got: Gihîştina rêjeyên bilindkirina heqdestan bo astên qebûlkirî ne sînor e, ne dawî ye û ne encam e, û weha li ser zêde kir: “Em tu tiştî li Sûrîyan pir nabînin, ev erkê me ye ku em pê rabin, û şikir ji Xwedê re, ev hemû ji xwêdana enîya Sûrîyê ye.”
Ji alîyekî din ve, Serok El-Şeri’ bal kişand ser wê yekê ku “welat gelekî wêran bûbû”, û dabînkirina enerjîya elektrîkê di heyama salekê de da ku bigihîje derdora 20 saetan, yan bo 24 saetan di hinek deman de, yan bo 16 saetan li gundewaran, wek mijareke zehmet tê hesibandin li gorî wê ketwara ku ji rejîma berê mîrat maye û rewşa sektora enerjîyê li welêt.
Serok El-Şeri’ da zanîn ku “gelek tişt li ser sektora enerjîyê tên avakirin, û ew mîna hemî sektorên din ji gelek nexweşîyan û têkçûneke mezin dinale”.
Her weha Serok El-Şeri’ bal kişand ser wê yekê ku “piştgirêdan bi rengekî bingehîn li ser vîna gelê Sûrîyê bû”, û dîyar kir ku “gelê Sûrîyê kedkar û karker e, xwedî ezmûn e û kar dizane, û erkê dewletê dabînkirina keşûhewaya guncaw e ji bo vê civakê da ku hêdî hêdî kar bike”.
Hêjayî gotinê ye ku Serok El-Şeri’ di 20ê Adara borî de mersûma hejmar (67) derxistibû ku li gorî wê rêjeya 50 ji sedî li mûçe û heqdestên birî yên tevahîya karkerên di sazîyên dewletê de zêde dibe. Her weha mersûma hejmar (68) jî derxistibû ya taybet bi sepandina lîsteya zêdekirineke taybet li ser mûçe û heqdestên karkerên bi hejmarek alîyên giştî, ev yek jî di çarçoveya baştirkirina rewşa jîyanê ya welatîyan de hatibû kirin.
