Şam-SANA
Wezaretên Darayî, Xwendina Bilind û Lêkolîna Zanistî, Tenduristî, û Perwerde û Hînkirinê rêziknameyên cîbicîkirinê yên mersûma jimare (68) a sala 2026an derxistin, ku taybet e bi zêdekirina mûçe û heqdestên karmendên sektorên Xwendina Bilind û Lêkolîna Zanistî, Perwerde û Hînkirinê, û Tenduristîyê li Sûrîyê.
Sektora Xwendina Bilind
Wezareta Darayî û Xwendina Bilind di daxuyanîyeke hevbeş de zêdekirina mûçeyên kadroyên ku di sazîyên xwendina bilind û lêkolîna zanistî de dixebitin ragihand, bi mebesta xurtkirina aramîya pîşeyî û baştirkirina kalîteya perwerde û lêkolîna zanistî di zanîngeh, peymangeh û nexweşxaneyên zanîngehê de.
Her du wezaretan zelal kir ku sûdwergirtina ji vê zêdekirinê li gorî rêziknameyên fermî û li jêr navê pîşeyî û sîfeta qanûnî ya karmend tê dîyarkirin, ne tenê li ser navê sazîyê. Her wiha tekez kir ku hevahengîya di navbera sîyaseta darayî û perwerdehîyê de û veberhênana kadroyên mirovî ji bo geşkirina vê sektorê û baştirkirina şert û mercên jîyana karmendan pêwîst e, da ku xizmeta civak, xwendekar û lêkolîna zanistî bike.
Li gorî xişteyên pêvekirî yên daxuyanîyê, astên darayî yên nû ji bo her pîşeyekî wiha ne:
- Serokê Zanîngehê û Rêveberê Giştî yê Desteya Giştî: Tevahîya mûçe 218,550 lîreyên nû yên Sûrî (134,380 lîre mûçeyê, û 84,170 lîre qerebûkirin).
- Cîgirên serokên zanîngehan, rêveberên peymangehên bilind, û sekreterên encumenan: Tevahîya mûçeyê 173,630 lîre.
- Ragirên fakulteyan û emîndarên zanîngehan: Tevahîya mûçeyê 139,780 lîre.
- Profesorên zanîngehê: Tevahîya mûçeyê 134,530 lîre.
- Cîgirên ragiran û wekîlên peymangehan: Tevahîya mûçeyê 128,930 lîre.
- Karên perwerdehîyê yên alîkar, mîna şêwirmend, xebatkarên laboratuwarê û pirtûkxanewan: Tevahîya mûçeyê 32,500 lîre.
Sektora Perwerdeyê
Wezaretên Darayî û Perwerde û Hînkirinê jî di daxuyanîyeke hevbeş de tekez kirin ku zêdekirina mûçeyan wekî pêzanînekê ji bo rola kadroyên perwerdeyê û piştgirîkirina aramîya wan a pîşeyî û jîyanî tê, da ku peyama dibistana Sûrî xurt bibe.
Her du wezaretan dîyar kir ku karmendên li deverên dûrdest ji qerebûkirina zêde bi rêjeya 15% sûdê werdigirin, û bi rêjeya 10% ji bo deverên nîv-dûrdest, li gorî dîyarkirina Emîndarîya Giştî ya Serokatîya Komarê.
Li gorî xişteyên fermî, tevahiya mûçeyan (mûçe + qerebûkirin) ji bo beşên herî berbiçav wiha ne:
- Alîkarê Rêveberê Perwerde û Hînkirinê: 52,000 lîre.
- Serokê daîreyê yan beşê (navendî): 51,350 lîre.
- Çavdêrê yekem: 46,800 lîre.
- Serperiştê komelgehê û serokê daîreyê (şaxî): 42,250 lîre.
- Mamosteyê polê û hîndekar (rêzbendîya yekem): 36,400 lîre.
- Karên perwerdehîyê yên alîkar (şêwirmend, xebatkarê laboratuwarê, pirtûkxanewan): 32,500 lîre.
Sektora Tenduristîyê
Di heman çarçoveyê de, wezaretên Darayî û Tenduristîyê di daxuyanîyeke hevbeş de destnîşan kirin ku zêdekirina mûçeyan ji bo piştgirîkirina kadroyên tenduristîyê û aramîya wan a jîyanî, û her wiha ji bo kişandina pisporan da ku çavdêrîya tenduristîyê ya berfireh bi pêş bixin û ewlehîya tenduristîyê biparêzin tê. Ev gav wekî beşek ji peyama dewleta Sûrî ya nû ji bo baştirkirina jîyanê û pêkanîna vegirtina tenduristîyê ya giştî di sala 2030an de tê hesibandin.
Her wiha karmendên li deverên dûrdest ji qerebûkirina zêde bi rêjeya 15% sûdê werdigirin, û bi rêjeya 10% ji bo deverên nîv-dûrdest bi biryara Emîndarîya Giştî ya Serokatîya Komarê.
Li gorî rêziknameyên cîbicîkirinê, hûrgilîyên zêdekirinê wiha ne:
- Rêveberê rêveberîya tenduristîyê: Mûçeyê 39,000 lîre, û qerebûkirin 104,000 lîre, bi giştî 143,000 lîre.
- Alîkarê Rêveberê Tenduristîyê: Mûçeyê 19,500 lîre, û qerebûkirin 91,000 lîre, bi giştî 110,500 lîre.
- Rêveberê Giştî: Mûçeyê 39,000 lîre, û qerebûkirin 104,000 lîre, bi giştî 143,000 lîre.
- Rêveberê Rêveberîya Navendî: Mûçeyê 29,500 lîre, û qerebûkirin 104,000 lîre, bi giştî 133,500 lîre.
- Rêveberê nexweşxaneyê: Mûçeyê 39,000 lîre, û qerebûkirin 78,000 lîre, bi giştî 117,000 lîre.
- Rêveberê navenda tenduristîyê: Mûçeyê 39,000 lîre, û qerebûkirin 61,100 lîre, bi giştî 100,100 lîre.
Wezareta Darayî pêr roja Pêncşemê rênimayên cîbicîkirinê yên têkildarî mersûma serokatîyê ya jimare 68 a sala 2026an derxistibû, derbarê zêdekirina taybet a mûçe û heqdestên karmendên di hejmarek sazîyên giştî de.
