Şam – SANA
Berdevkê Wezareta Navxweyî Nûredîn El-Baba di konferanseke rojnamevanî de ragihand ku Wezaretê planeke belavbûna ewlehîyê ji bo parastina parêzgeha Hesekê amade kiriye. Ev plan hevdem ligel ketina yekîneyên Artêşa Sûrîyê û ji bo serxistina peymana di navbera hikûmeta Sûrî û HSDê de hatiye îmzekirin, tê meşandin.
El-Baba bal kişand ser rewşa kampa Holê û got: “Rewşa mirovî di hundirê kampa Holê de bi her rengî şokdar bû û dişibî kampa girtina bi darê zorê. Bi hezaran kes bi salan di şert û mercên dijwar de li herêmeke nîv-çolî ya bê binesazî hatibûn girtin, ev yek jî li dijî prensîbên bingehîn ên dadwerî û mafên mirovan e”.
Berdevk dîyar kir ku ji kêlîyên pêşîn ve, Wezareta Navxweyî dest bi kontrolkirina ewlehîyê, girtina qulên dîwarê kampa Holê û parastina derdora wê kiriye. Cih xistiye bin çavdêrîya alîyên peywendîdar û bi hevkarîya rêxistinên civaka sivîl hewcedarîyên mirovî dabîn kirine. Her wiha dest bi kontrolkirina zanyarî û belgeyên nasnameyên girtîyan hatîye kirin.
Derbarê kesên ku ji kampê derketine, El-Baba destnîşan kir ku Wezaret rewşa kesên ku bi awayekî bêserûber derketine dişopîne; piranîya wan vegerandin û rewşa wan a yasayî birêkûpêk kirin. Niştecihên kampê jî bo cihekî alternatîf hatin veguhastin ku tê de mercên mirovî baştir in û gihîştina bi wî cihî hêsantir e.
Hikûmeta Sûrî tekez dike ku nêzîkatîya wê li ser bingeha rêzgirtina rûmeta mirovî û sepandina qanûnê bi dadperwerî ye, dûrî sîyasîkirina êşa sivîlan. Her wiha hat ragihandin ku dê li pey her kesê ku tawanbarîya wî di sûcan de were îsbatkirin be, bi rêya rêkarên dadwerî yên dadperwer û şefaf.
Di dawîyê de, El-Baba soz da gel ku Wezareta Navxweyî dê wek destê parastin û ewlehîyê bimîne û dê bixebite ku her kesê zîyan dîtî vegerîne nava civaka xwe wekî welatîyekî ku xwedî maf e û erkên xwe di bin sîbera dewleta qanûn û sazîyan de bi cih tîne.
