SANA-ŞAM
Rêveberê Karûbarên Erebî li Wezareta Derve û Koçberan Dr. Mihemed Teha El-Ehmed tekez kir ku ti rastîya nûçeyên dirêjkirina mohleta ku hikûmeta Sûrîyê dabû Hêzên Sûrîya Demokratîk (HSD) derbarê paşeroja parêzgeha Hesekê nîne.
El-Ehmed di daxuyanîyekê de ji bo SANAyê ragihand:
“HSD” her tim daxwaza mohlet û agirbestan dike daku demê bi dest bixe, lê bi armanceke nezelal. Her wiha îro hewl dide bi belavkirina gotegotên dirêjkirina agirbestê, dewleta Sûrîyê bixe tengasîyê.
Heta niha ti bersiveke erênî ji bo pêşnîyarên dewleta Sûrîyê tune ye, berevajî wê, binpêkirineke berdewam ji bo agirbest û rawestandina şer hebû.
Dewleta Sûrîyê pêşnîyarek derbarê postên bilind di dewletê de pêşkêş kir, lê heta niha “HSD”ê ti kes berbijêr nekiriye.
Hemû vebijark berdest in, digel anîna pêş a aramî û dîyalogê ji bo cîbicîkirina qanûnê daku Sûrîye bibe yek û mafên gelê Sûrîyê parastî bin, dûrî zext û gefan û bi xizmetguzarîyên herî baş.
Ji ber pabendnebûna bi rawestandina şer û binpêkirinên dubare, û bersivnedana pêşnîyarên serokatîya Sûrîyê, em dibînin ku sedema vê yekê vedigere dabeşbûna navxweyî di nav refên “HSD”ê de, û zeftkirina biryara wan a niştimanî ji bo armancên hizbî yên teng ku ji derve tên birêvebirin.
Pêdivî ye ku hemû çekên giran, sivik û navîn di destê dewleta Sûrîyê de bin, ku Wezareta Parastinê û ya Navxwe nûnertîya wê dikin; ji ber ku ti hewcedarî nîne ku çekek li derveyî van her du sazîyan be, ji ber ku ew dê parastinê li dijî gefên ewlehîyê yên derveyî û hundirîn dabîn bikin.
Hatina endamên rêxistina PKKê bo nav axa Sûrîyê binpêkirineke eşkere ya qanûnên navdewletî û zagonan e, ji ber ku ew rêxistineke terorîst e, her wiha li dijî qanûnên Sûrîyê ye, û serederî dê bi awayekî qanûnî bi van binpêkirinan re were kirin.
Ti nerazîbûn li ser hin navên taybet ji “HSD”ê nîne daku postên di hikûmetê de wergirin, nexasim ku berbijêrên niştimanperwer bin, navûdengê wan baş be û xwedî şîyanên hunerî û teknîkî bin ji bo pêkanîna erkên xwe.
