Şam-SANA
Wezîrê Dadê Mezher El-Weys, tekez kir ku Wezareta Dadê ji bo avakirina desthilateke dadwerîyê ya serbixwe û kartêker dixebite, da ku bibe stûna avakirina Sûrîya nû, dewleta mafan, hemwelatîbûn û dadê. Dîyar jî kir ku gelê Sûrîyê dê di şerê avakirinê de bi ser bikeve, çawa ku di şerê rûxandina zordaran de bi ser ket.
Wezîr destnîşan kir ku erkê sereke yê Wezaretê, xurtkirina serxwebûna dadwerîyê û misogerkirina ku bandor li ser dadger tunebe, ji bo vegerandina bawerîya hemwelatî û veberhêneran, çi Sûrî çi jî Ereb an jî bîyanî bin.
Plana çaksazkirina berfireh li ser çend xalên sereke tê avakirin:
Xebata li dijî gendelîyê: Nehiştina gendelîyê li nav dezgehên dadwerîyê.
Çaksazkirina yasadanînê: Nirxandina binyata danîna qanûnan û cîbicîkirina wan ji bo pêkanîna “Edaleta Kartêker”.
Dadwerîya Veguhêz: Çareserkirina mîrata giran a binpêkirin û biryarên kotekî yên darvekirin, zindan û desteserkirinê yên rejîma berê li pey xwe hiştine. El-Weys tekez kir ku ji bo çareserkirina van dosyayan, li ser bingeha prensîba “Serketina Bêtolhildan” ya Serok Ehmed El-Şeri’, komîteyên pispor hatine avakirin, bi mebesta parastina tevna civakî û avakirina dewleta hemwelatîbûnê.
Vegerandina rûmeta karmendan: Başkirina rewşa darayî û derûnî ya karmendan ji bo kêmkirina gendelîyê.
Dijîtalkirina tedbîrên kar: Danîna planekê ji bo dîjîtalkirinê ji bo gihiştina asta pêşveçûna cîhanî, ev yek dê bihêle dadwerî bi zelalî di demeke nêz de bi cî were.
El-Weys axaftina xwe bi tekezkirina li ser wê yekê bi dawî kir ku dezgehên dadwerîyê dê bibin parêzvanên mafan û misogerkerên azadîyê, û Sûrî dê di demeke nêzîk di vî warî de bigihêjin asta dewletên pêşketî.
