Kopenhag – SANA
Serokwezîra Danîmarkayê Mette Frederiksen got ku herêma Grînlendayê ya xwedî-rêveberîya xweser di nava Mîrnişînîya Danîmarkayê de, di “demeke hestyar” re derbas dibe, di bin sîya hewldanên serokê Amerîkayê Donald Trump de ji bo tevlîkirina wê.
Tora Sky News îro Duşemê ji ser zarê Frederiksen ragihand, ku di gotûbêjeke duh de ligel serokên partîyên Danîmarkayê gotiye: “Li ser Grînlendayê nakokîyek heye, ev demek çarenivîs e, û mijar ji ya ku li ber çavan xuya dike kûrtir e.”
Wê hişyarîya xwe nû kir ku her gefek li ser endamekî Peymana Atlastîka Bakur (NATO) wê pergala ewlehîya komî ya ku ji dawîya Şerê Cîhanê yê Duyem ve heyî hilweşîne.
Frederiksen di peyamên paşê de ku li ser platformên Facebook û Instagramê weşandin, tekez kir ku welatê wê pabendî qanûnên navdewletî, mafê gelan di dîyarkirina çarenivîsa xwe de û yekparçeyîya xakê ye.
ragihand ku wezîrê derve yê Danîmarkayê wê hefteya bê ligel hevtayê xwe yê Amerîkî bicive da ku dosya “Grînlendayê” gotûbêj bikin, wek bersivekê ji bo daxwazeke hevbeş a Danîmarka û hikûmeta herêmê, û tekez kir ku welatê wê di “rêyeke duber” re derbas dibe.
Serokê Amerîkayê destdanîna ser “Grînlendayê” ya dewlemend bi çavkanîyan wek mijareke jîyanî ji bo ewlehîya neteweyî nirxand, û îşaret bi wê yekê kir ku dibe Waşington neçar bimîne ku di navbera yekrêzîya hevpeymanîya “NATO” û hewldanên bidestxistina herêmê de yekê hilbijêre.
Grînlenda ku hejmara niştecîhên wê kêmtirî 57 hezar kes e û qeşayê nêzîkî çar parên pêncan ji rûberê wê girtiye, di nav Mîrnişînîya Danîmarkayê ya endama NATOyê de xwedî rêveberîyeke xweser a berfireh e.
Niştecîhên herêmê gelek caran redkirina xwe ji bo tevlîbûna Dewletên Yekbûyî yên Amerîkayê anîne ziman, di heman demê de Kopenhag tekez dike ku ew pabendî prensîba serwerîyê û mafê dîyarkirina çarenivîsê ye li gorî qanûnên navdewletî.
