Canberra-SANA
Hikûmeta Awistralyayê îro Supaya Pasdaran a Îranê xist lîsteya xwe ya dewlet û qewareyên ku piştevanîya terorê dikin.
Di daxuyanîyeke hevbeş de ku di navbera wezaretên Derve, Navxwe û Dozgerîya Giştî ya Awistralyayê de hat dayîn û îro li ser malpera fermî ya Wezareta Derve hat weşandin, hat dîyarkirin ku hikûmetê soza avêtina vê gavê dabû. Ev yek piştî nirxandina Ajansa Îstixbarata Ewlehîyê ya Awistralyayê (ASIO) hat ku dîyar kiribû Supaya Pasdaran êrîşên li ser xwaringeha “Lewis Continental Kitchen”ê li Sydneyê di Cotmeha 2024an de û sînagogeke Cihûyan li Melbournê di Kanûna Pêşîn a heman salê de organîze kirine.
Daxuyanîyê amaje bi wê yekê kir ku Supaya Pasdaran a Îranê yekemîn alî ye ku di bin vê çarçoveya nû de dikeve lîsteya dewletên piştevanîya terorê dikin, û destnîşan kir ku bicihkirina Supaya Pasdaran li ser lîsteya terorê asteng û rêgirîyeke girîng e li pêşîya çalakîyên terorîstî.
Tê zanîn ku di Cotmeha 2024an de, xwaringehek li rojhilatê Sydneyê rastî şewitandina bi qestî hat û bi temamî wêran bû bêyî ku kes birîndar bibe. Di Kanûna Pêşîn a heman salê de jî, sînagogeke Cihûyan li Melbournê bi kiryareke mîna wê hat armanckirin. Polîsên Awistralyayê ev yek wekî bûyerên girêdayî torên têkder hesibandin û ji bo şopandina kesên têwerbûyî lêkolînên berfireh dan destpêkirin.
