Havana-SANA
Wezareta Tenduristîyê ya Kûbayê ragihand ku ji Tîrmeha borî ve, ji ber belavbûna vîrusên Şîkungunya û taya Dengue ku bi rêya pêşûyan (mêşan) vediguhezin, 33 kesan ku 21 ji wan zarok in, jîyana xwe ji dest daye.
Ajansa France Presse ji zarê Cîgira Wezîrê Tenduristîyê ya Kûbayê Carilda Peña ragihand: “Piranîya mirinan ji ber vîrusa Şîkungunya ye, ku dibe sedema nîşanên wekî ta û êşa movikan, û dikare mirov bê hêz bike lê kêm caran kujer e, lê taya Dengue ku nîşanên wê dişibin Înfluenzayê, bû sedema mirina 12 kesan.”
Vîrusa Şîkungunya di Tîrmeha borî de li parêzgeha Matanzas a rojavayê Kûbayê derket, lê zû li her 15 parêzgehên welêt ku nifûsa wan nêzîkî deh milyon kes e, belav bû.
Kûbayê karîbû li hember belavbûna berê ya taya Şîkungunyayê ya sala 2014an rawste, lê ragihand ku vê carê belavbûna nexweşîyê ji kontrolê derketiye, sedem jî “kêmasîya paqijîyê, kombûna zibil û komkirina avê di depoyan de ji alîyê xelkê ve ji bo rûbirûbûna qeyrana kêmbûna ava paqij” e.
Tê zanîn ku Şîkungunya û taya Dengue du nexweşîyên vîrusî ne ku bi rêya pêvedana pêşûyan vediguhezin, û dibin sedema nîşanên wekhev ên mîna ta, serêş û êşa movik û masûlkeyan, lê ew di dijwarîya alozîyan û xûyê vîrusa sedemkar de ji hev cuda ne.
