Şam-SANA
Rêveberê Giştî yê Sazîya Sûrî ya Nanpêjan Mihemed Tariq El-Seyadî tekez kir ku nanpêjên li bajarê Helebê bi awayekî birêkûpêk û bi hemî kapasîteya xwe ya hilberînê bêyî rawestandin xebatên xwe berdewam dikin, da ku dabînkirina pêdivîyên welatîyan ji nan bi awayekî berdewam misoger bibe.
El-Seyadî îro di daxuyanîyekê de ji nûçegihanê SANAyê re got: Sazîyê hemû amadekarîyên pêwîst dîtine ji bo misogerkirina îstîqrara pêvajoya hilberînê, bi rêya dabînkirina arvan, sotemenî, kadroyên teknîkî û îdarî, û şopandina amadebaşîya xetên hilberînê di bîst û çar saetan de li hemû nanpêjên ser bi sazîyê ve li bajêr.
El-Seyadî bal kişand ser wê yekê ku tîmên şopandin û lênihêrînê rojane dixebitin ji bo çareserkirina her têkçûneke ji nişka ve û misogerkirina berdewamîya hilberînê, û tekez kir ku sazî bi hurgulî li ser parastina kalîteya nan û başkirina asta xizmetguzarîya ku pêşkêşî welatîyên bajarê Helebê tê kirin, radiweste.
Sazîya Sûrî ya Nanpêjan bi rêya tora nanpêjên li bajêr belavbûyî roleke sereke di dabînkirina hilberîn û belavkirina wê de dilîze, ligel şopandina berdewam a rewşa xebatê û dabînkirina pêdivîyên xebitandinê bi awayekî ku hebûna nan ji welatîyan re di hemû mercan de peyda bike.
