Şam-SANA
Wezareta Tenduristîyê bi hevkarîya Rêveberîya Tenduristîyê ya Tertûsê, çalakîyên Hefteya Cîhanî ya Handana li ser Şîrdana Siruştî ya sala 2026an yên bi dirûşma: “Şîrdana siruştî destpêkeke domdar e di jîyanê de.. De ka em ezmûnên serkeftî xurt bikin” dan destpêkirin, bi amadebûna nûnerên parêzgehê, sazîyên tenduristîyê û rêxistinên navdewletî.
Armanca çalakîyan bilindkirina hişyarîyê ye derbarê girîngîya şîrdana siruştî û rola wê ya sereke di baştirkirina tenduristîya dayik û zarokan de, û kêmkirina rêjeya mirina zarokan, her wiha ronîdana li ser ezmûn û bernameyên serkeftî yên piştgirîya vê yekê dikin.
Alîkarê Wezîrê Tenduristîyê ji bo Karûbarên Tenduristîyê, Dr. Hisên El-Xetîb, tekez kir ku wezaret pabend e bi xurtkirina xizmetên şêwirmendî û piştgirîyê ji dayikan re, bilindkirina asta şarezatîya kadroyên tenduristîyê, û peydakirina jîngeheke piştgir bi hevkarîya ligel şirîkan. Ji alîyê xwe ve, Rêveberê Tenduristîyê yê Tertûsê, Ela El-Berhûm, bal kişand ser wê yekê ku şîrdana siruştî bingeha sereke ye ji bo avakirina laş û hişekî saxlem, û piştrast kir ku cîbicîkirina planên ji bo bilindkirina asta tenduristîya dayik û zarokan hatine terxankirin berdewam e.
Di çalakîyê de encamên rapirsîna «SMART» ya xurekê ya sala 2025an hatin nîşandan; encaman dîyar kir ku rêjeya şîrdana siruştî bi tenê di şeş mehên yekem de li Sûrîyê gihîştiye 45.6%, di demekê ku rêjeya destpêkirina şîrdanê di saeta yekem a zayînê de gihîştiye 30.6%.
Her wiha di vê helkeftê de bername û çalakîyên ku tên bicîanîn ji bo piştgirîya şîrdana siruştî li Tertûs û parêzgehên din ên cuda cuda hatin pêşandin, ligel pêşkêşkirina çend perçeyên şano û stranên armancdar. Ev xebat li hemû sazîyên tenduristîyê yên ser bi Rêveberîya Tenduristîyê ya Tertûsê ve, bi rêya pêşkêşkirina çalakîyên hişyarkirinê yên berfireh, berdewam in.
