Şam-SANA
Patrîkê Entakya û hemû Rojhilat ê Romên Ortodoks Yuhenayê Dehem tekez kir ku Mesîhîyên li deverê ne daxwazkerên parastinê ne û bal kişand ser pêwîstîya hevparîya di navbera hemû şênîyên welat de ji bo parastin û avakirina niştiman.
Ev daxuyanîyên Patrîk di dema qedasa ku îro danê sibê li Katedrala Meryemîyê ya Şamê bi boneya Cejna Sersalê bi rê ve bir de hatin. Metropolîtê Helebê Efram Malûlî, metropolîtê Himsê Grîgoriyos Xûrî û hin keşe û oldarên Mesîhî yên din beşdarî qedasê bûn.
Patrîk Yuhenayê Dehem di peyva xwe de got: “Em ji bo aştîya Sûrîye û Libnanê, ji bo aştîya Rojhilata Navîn û tevahîya cîhanê nimêj dikin. Her wiha em ji bo kesên hatine revandin nimêj dikin, nexasim ji bo her du metranên Helebê Yuhena Îbrahîm û Bolis Yazicî.”
Patrîkê Entakya û hemû Rojhilat ê Romên Ortodoks di berdewamîya axaftina xwe de got: “Em ecêb nabînin eger şert û mercên wisa çêbibin ku hinek bifikirin ku divê teslîm bibin an koç bikin, lê em welatê xwe naterikînin û em ê teslîmî tu tiştî nebin.”
Patrîk Yuhenayê Dehem di weiza xwe de Patrîk Îgnatiyosê Çarem Hezîm bi bîr anî û axaftina xwe wiha kuta kir: “Ez red dikim Rojhilata Navîn bêyî Mesîhîyan û bêyî Ola Mesîhî xeyal bikim, ji ber ku Mesîh bi xwe kurê Rojhilata Navîn e.”
Hêjayî gotinê ye ku Serok Ehmed El-Şeri’ li ser hesabê xwe yê Xê sersal li gelê Sûrîyê pîroz kir û hêvîya “siberojeke geş ku Sûrîye tê de hevgirtî, xurt û aram bimîne” anî ser zimên.
