Heleb-SANA
Wezîrê Rewşên Awarte û Birêvebirina Karesatan Raid El-Salih û Parêzgarê Helebê Ezzam El-Xerîb, ji bajarokê Minixê, ragihand ku qonaxa yekem a projeya rakirin û veguhestina kavilan ji her du deverên Çîyayê Sem’an ê Bakur û Izazê bi dawî hat, her wiha dan zanîn ku qonaxa duyem a projeyê ligel berfirehkirina qada wê da ku herêmên nû li xwe bigre dest pê kiriye.
Tîman di qonaxa yekem de, nêzîkî 550 hezar metrekupên kavilan ji zêdetirî 30 bajar û bajarokan rakirin, bi armanca vekirina rê û meydanên giştî’ her wiha jinavbirina bermayîyên şer, wek rêxweşkirinê li pêşîya vegerandina xizmetguzarîyan û dabînkirina mercên guncaw ji bo vegera koçberan bo malên wan.
Parêzgarê Helebê Ezzam El-Xerîb, dîyar kir ku kar bi rêya dabeşkirina kavilan û veqetandina yên ku pêkan e ji nû ve bên bikaranîn tê kirin, da ku di xebatên jêrxaneyê û sazkirina rêyan de, bi hevrêzîya ligel encumenên xwecihî, bên bikaranîn, ligel berçavgirtina rêzgirtina li mafên xwedîyên milkan.
El-Xerîb bal kişand ser wê yekê ku qonxa duyem herêmên Etarib, El-Sifêre û Sem’an a Başûr li xwe digire, ligel temamkirina karan li Sem’an a Bakur û Izazê, bi mercê ku piroje berî dawîya sala 2026an bi dawî bibe, wek amadekarîyekê ji bo destpêkirina qonaxeke nû di heyvên pêşîn ên sala bê de.
Ji alîyê xwe ve, Rêveberê Rewşên Awarte û Birêvebirina Karesatan li Helebê, Mihemed El-Receb, dîyar kir ku proje 5 herêmên sereke li xwe digire, û di heman dema projeyê de, karên vekirina rêyan, gera li mîn û teqemenîyên neteqîyayî jî têne kirin, da ku vegereke bidilxwazî û ewle ji şênîyan re were dabînkirin.
Her wiha Rêveberê Bajarokê Hirêtanê Xalid El-Cexil, tekez kir ku armanca berfirehkirina qada kar, lezkirina rakirina şûnmayên wêranîyê û vegerandina çalakîyên xizmetguzarî û avadanîyê ye.
