Hesekê-SANA
Cîgirê Parêzgarê Hesekê Ehmed El-Hîlalî, duh Sêşemê belavbûna hêzên ewlehîyê yên girêdayî Fermandarîya Ewlehîya Hundirîn li parêzgehê ragihand. Ev yek di çarçoveya planên tijîkirina valahîyê û dabînkirina pêdivîyên ewlehîyê li parêzgehê pêk tê.
El-Hîlalî di daxuyanîyekê de ku Rêveberîya Ragihandina Hesekê duh Sêşemê li ser kanala xwe ya Telegramê weşand, dîyar kir ku parêzgeh dê bi endamên ewlehîya rêyan û polîsên geştyarîyê were xurtkirin û qereqolên berê yên li parêzgehê ji nû ve werin çalakkirin; ev pêngav ji bo dabînkirina pêdivîyên ewlehîyê yên parêzgehê li pey hev tên.
El-Hîlalî di daxuyanîyekê de ji bo SANAyê eşkere kir ku endamên Ewlehîya Hundirîn ji bo dagirtina valahîya li parêzgehê belav bûne, nexasim li Kampa Tela’i’ û li derdora bajarê Qamişloyê, her wiha hebûna wan dê bi rêya endamên ewlehîya rêyan li ser rêyên sereke yên parêzgehê were xurtkirin, li gorî dîtina dewleta Sûrîyê û nasnameya dîtbarî ya Wezareta Hundir.
Hêjayî gotinê ye ku Mezlûm Ebdî di 25ê Tebaxa borî de hilweşandina “HSD”ê û tevlîbûna wê ya tam di nav sazîyên dewletê de ragihandibû.
Ragihandina tevlîbûna HSDê qonaxekê di rêyeke berfirehtir de nîşan dide ku sernavê wê derbasbûna ji rêkarên şer ên ku ji hêla rejîma revîyayî ve hatibûn ferzkirin ber bi sazîyên dewletê ve ye, her wiha ji birêvebirina qeyranan ber bi çareserkirina kokên wan ve ye. Bi vî rengî, rê ji Sûrîya yekgirtî re vedibe ku qonaxeke nû bide destpêkirin; tê de pirrengî bibe hêmanek ji hêmanên hêza wê, maf bibin parçeyek ji pergala wê ya yasayî û aramî jî bibe bingeha geşepêdan û jinûveavakirinê.
