Heseke-SANA
Cîgirê Parêzgarê Hesekê Ehmed El-Hîlalî piştrast kir ku pêvajoya yekkirina endamên hêzên “Asayîşê” yên ser bi HSDê ve di nav Wezareta Hundir de dê demeke nêzîk dest pê bike. Ev yek di çarçoveya bicihanîna peymana 29ê Kanûna Duyem a borî û li gorî hevtêgihiştinên têkildarî yekkirina sazîyên ewlehî û leşkerî di bin sîwana dewletê de tê.
El-Hîlalî di axaftina xwe de ji bo malpera “Al-Ixbarîye” duh Pêncşemê got: Pêvajoya tevlîkirinê dê bi pêkanîna hevpeyvînên kesane bi endamên ku biryar wan li xwe digire dest pê bike. Li gorî lîsteyên navan ên seretayî, hejmara wan derdora 9 hezar endam e, ku di nav wan de hezar jin hene. Her wiha dîyar kir ku ev hejmar seretayî ye.
Cîgirê parêzgarê Hesekê eşkere kir ku qonaxa bê kontrolkirina dane, belgeyên kesane û tomara kar a her endamekî li xwe digire. Belavkirina kesên hatine qebûlkirin jî dê li gorî pêdivîyên Wezareta Hundir û cureyê pisporî û ezmûnan be.
Navborî da zanîn ku dema vê pêvajoyê girêdayî hejmara serlêderên rastîn û rêkarên îdarî û teknîkî yên pêwîst e. Lê belê kar li gorî planeke qonax bi qonax dimeşe ku armanca wê temamkirina beşê herî mezin ê rêkaran di meha Tîrmeha bê de ye, bi misogerkirina hûrbînî û şefafîyetê.
