Şam – SANA
Niştecihên Taxa Kurdan (Rikinedîn) li Şamê, di çarçoveya kampanya “Şehîd Ranya El-Ebasî” de, ji bo wefadarîya bi bîranîna wê û ya hemû şehîdan re, çalakîyeke xelatkirinê ji bo malbatên şehîdan organîze kirin.
Di vê destpêşxerîyê de, ya ku bi rêya sê navendan hat meşandin, pêşkêşkirina hinek alîkarîyên madî yên sembolîk ji bo alîkarîya malbatan û xurtkirina nirxên hevgirtinê hebû; bi taybetî bi nêzîkbûna meha Remezanê û di van mercên dijwar ên jîyanê de.
Serokê komîteya taxê, Mihemed Şemdîn, dîyar kir ku ev kar xebateke xwebexşî ye, ji hêla ciwanên taxê ve di bin navê “Multaqa” anku “Dîdargeh” de hatiye destpêkirin. Her wiha rûpeleke elektronîk ji bo wergirtina bexşan û weşandina lîsteyên rojane yên dahatan hatiye amadekirin, da ku zelalî di kar de hebe.
Heta niha nêzîkî hezar daxwaznameyî hatiye pêşkêşkirin; piştî lêkolînê, 700 kes wekî sûdmend hatin pejirandin û li ser sê navendan hatin dabeşkirin, di heman dema ku wergirtina navên nû hîn jî berdewam e.
Ji alîyê xwe ve, parêzer Hişam Qaso, destnîşan kir ku armanca vê kampanyayê her wiha belgekirina navên şehîdan û avakirina bingeheke datayan e da ku di bîr û bala xelkê de werin parastin. Wî tekez kir ku fînansekirina vê projeyê bi tenê ji bexşên xelkê taxê bi xwe ye. Malbatên şehîdan jî spasîya xwe ji bo vê destpêşxerîyê anîn ziman û ew wekî peyameke wefadarîyê bi fedakarîya zarokên xwe re dîtin.
