Şam-SANA
Tora Sûrî ya Mafên Mirovan (SNHR) banga hesabpirsînê ji berpirsên komkujîya Hemayê kir, ku rejîma Esed a rûxîyayî di sala 1982an de pêk anîbû. Di wê komkujîyê de nêzîkî 40 hezar sivîl hatin kuştin, 17 hezar winda bûn û gelek tax hatin wêrankirin. Torê tekez kir ku divê dadmendî ji bo qurbanîyan pêk were.
Torê di rapora xwe ya ku îro Duşemê bi helkefta 44emîn salvegera komkujîya Hemayê de hat weşandin, got: “Bi rûxandina rejîma Esed di 8ê Kanûna Pêşîn a 2024an de, derîyê qonaxeke nû li ser bingeha dadmendî û serwerîya qanûnê vebû.”
Torê her wisa bi bîr xist ku berteka navdewletî nebû, belgekirineke çalak û hesabpirsîn çênebû, û ti biryarên dîyarker ji hêla Encumena Ewlekarîyê ve nehatin dayîn. Ev yek bû sedem ku rejîm bawer bike ku ew dê ji sizayan rizgar bibe, û di encamê de binpêkirinên berfireh di demên piştî wê tawana mezin de berdewam kirin.
Torê daxwaza avakirina sazîyeke herêmî ji xelkê bajêr kir ji bo lêgerîna li nêzîkî 17 hezar kesên bi darê zorê hatine windakirin. Her wiha daxwaz kir ku desthilat gihîştina arşîvên ewlehîyê, dîyarkirina cihên gorên komî, pêkanîna lêkolînên tawankarîyê û naskirina terman û radestkirina wan ji malbatan re bidin vê sazîyê.
Li dawîyê jî, Tora Sûrî ya Mafên Mirovan daxwaz ji Neteweyên Yekbûyî kir ku bi fermî xemsarîya xwe di belgekirina komkujîyê de yan berteka li hember wê bipejirîne, belgeyên ku tawanên hatine kirin şermezar dikin biweşîne, êşa qurbanîyan nas bike û piştgirîya hewlên hesabpirsîna niştimanî ya Sûrîyê bike.
