Dera-SANA
Şaxê Sazîya Giştî ya Pirkirina Tov li Derayê dest bi belavkirina tovê genim li ser cotkar û komeleyên cotkaran kir, ji bo dabînkirina pêdivîyên cotkaran di demsala çandinîyê ya 2025-2026an de.
Serokê Beşa Bazargerîyê li şax, Endezyar Mufîd El-Ferwan, ji SANAyê re dîyar kir ku sazîyê dabînkirina tov ji bo cotkaran di demên çandinîyê de li xwe girtiye. Wî da zanîn ku şax nêzîkî 3750 ton tovê genim dabîn kiriye, û niha piştî derketina bihaya fermî ji Wezareta Çandinîyê, firotin ji bo cotkar û komeleyên cotkaran tê kirin.
Wî lê zêde kir: Cureyên ku niha berdest in Dûma 3, Şam 9, Şam 5 û Dûma 1 in, ji hemû cure û qonaxan. Wî amaje bi wê yekê jî kir ku sazî bi berdewamî ji bo xizmetkirina cotkar û komeleyên cotkaran û dabînkirina pêdivîyên wan ên tov li gorî belgeya rêkxistina çandinîyê ya ku ji alîyê Rêveberîya Çandinîyê ya Derayê ve hatiye derxistin, kar dike.
Serokê Komeleya Cotkaran li bajarokê Ibte’, Mihemed El-Herîrî, anî ziman ku rêkarên firotina tov bi hêsanî dimeşin, û bang kir ku çareserîyên pratîkî ji bo mijara birîna fatûreyan werin dîtin, da ku barê çûnûhatina di navbera bajarên Dera û Izra’yê de li ser cotkaran sivik bibe.
Wî hêvîya xwe anî ziman ku sala bê bibe sala xêrê û sûdê be bo cotkaran, û beşdarî xurtkirina ewlehîya xurekê bibe. Her wiha tekezî li ser girîngîya jinûvenirxandina bihayê fermî yê tovê genim û pejirandina bihayê wî bi Lîreya Sûrî kir ji bo çareserkirina pirsgirêk û guherînên nirxê xerckirinê.
Plana hilberînê ya şaxê Pirkirina Tov li Derayê ji bo sala 2025-2026an, hilberîna 12 hezar ton tovê genim bi taybetmendîyên pîvanî yên bilind li xwe digire.
Wezareta Çandinîyê ya Sûrîyê nirxê firotina tovê genim ji bo cotkaran ji bo demsala çandinîyê ya 2025–2026an, bi nirxê 500 dolarên Amerîkî ji bo her tonekê dîyar kiribû.
