Gundewarê Şamê – SANA
Desteya Netewî ya Kesên Bêserûşûn, piştrast kir ku wê bi hevrêzî digel tîmên parastina sivîl û bi beşdarîya nûnerên Dozgerîya Giştî, dest bi pêvajoya derxistin û belgekirina bermahîyên gora komî ya li li El-‘Utaybaya herêma El-Buheyra ya Gundewarê Şamê kiriye. Ev pêvajo, parastina rûmeta qurbanîyan û parastina delîlan misoger dike ku dê bibe destpêkek bo naskirina nasnameyên wan û piştgirîya malbatên wan di lêgerîna edalet û dadperwerîyê de.
Desteyê di daxuyanîyekê de ji SANAyê re rave kir ku piştî wergirtina agahdarîya ji qereqola navçeya El-‘Utaybayê ku hindek bermahîyên wekî hestîyan di zevîyeke çandinîyê de tên dîtin, wan dest bi pêvajoya xwe kir.
Wekî din jî, Desteyê bang li welatîyan kir ku nêzîkî bermahîyan nebin an desttêwerdanê nekin, û erkên belgekirin û derxistinê ji rayedarên pêwendîdar re bihêlin da ku ew bermahî parastî bimînin û rûmeta şehîdan, mafên qurbanîyan û malbatên wan jê bên parastin.
Li alîyê din jî, Desteyê rave kir ku ev bûyer a komkujîya ku di 27ê Sibata 2014an de li El-‘Utaybayê pêk hatiye. Ew jî ku kemînek ji alîyê hêzên rejîma berê ve hatibû danîn ku di encamê de bi dehan kes hatin kuştin û nêzîkî 270 sivîl û leşkerên revîyayî winda bûn.
Her weha Desteyê piştrast kir ku tawana El-‘Utaybayê dê wekî şahidekî zindî be li ser binpêkirinên giran ên ku rejîma berê li dijî gelê Sûrîyeyê kirine, û ew ê ji bo eşkerekirina çarenûsa kesên serwinda û parastina mafên malbatên wan, her li ber xwe bide.
Dozgerê Giştî yê Gundewarê Şamê, Dadwer Mihemed Omer Hacir, duh ragihand ku li herêma El-Buheyra ya El-‘Utaybayê goristaneke komî hatiye dîtin ku tê de termên nêzîkî 170 sivîlên ji Xûtaya Şerqî û deverên hawîrdorê hene ku berî çend salan dema ku hewl didan ji dorpêç û birçîbûnê birevin, mirine.
