Heseke-SANA
Dibistanên dewletê li parêzgeha Hesekê dergehên xwe ji bo pêşwazîkirina bi hezarên xwendekaran ligel destpêkirina sala nû ya xwendinê ya 2026-2027an vekirin, piştî rawestana ku zêdetirî du salan berdewam kir. Ev yek piştî gelek amadekarîyan e ku ji hêla rêveberîya perwerdeyê ve hatine kirin, ji bo misogerkirina berdewamîya xwendinê û peydakirina pêdivîyên bingehîn.
Di roja pêşîn de piranîya xwendekaran bi awayekî birêkûpêk di polên xwe de li dibistanên amadekirî bi cih bûn, ligel berdewamîya karên nûjenkirin û çaksazkirina dibistanên din bi hevkarîya rêxistinên navneteweyî, di demekê de ku hinek dibistan ji ber ku rastî wêranbûnê hatine pêdivîya wan bi avakirina ji nû ve heye.
Rêveberê Perwerdeyê li Hesekê, Ednan Berrî, dîyar kir ku rêveberîyê hevrêzkarî ji bo amadekirina dibistanan û peydakirina hewcedarîyên perwerdeyê kiriye, û bal kişand ser destpêkirina ezmûnên destnîşankirina asta zanistî ya xwendekarên qonaxên veguhêz û yên cîyawaz, û danîna planan ji bo çareserkirina rewşa xwendekarên ku xwendin li wan çûye û kêmasî di asta wan a hînbûnê de heye, her wiha tekezî li ser hêsankirina rêkarên tomarkirinê û pabendbûna bi rênimayên wezaretê, kir.
Ji alîyê xwe ve, rêvebera dibistana “Gibraêl Mûsa”, I’tîmad El-Menfî, tekez kir ku dest bi dana dersan û tomarkirina zarokên pola yekem hatiye kirin, û piştrast kir ku vegera dibistanan pêngaveke bingehîn e ji bo xurtkirina aramîya perwerdeyê û dabînkirina derfetê ji bo xwendekaran da ku xwendina xwe berdewam bikin.
Ji alîyekî din ve, malbatan kêfxweşîya xwe bi vegera xwendinê û birêkûpêkbûna wê li gorî rêbazên Wezareta Perwerdeyê ya Sûrîyê, anî ziman, û amaje bi wê yekê kirin ku yekkirina rêbazan, gaveke erênî ye ji bo dabînkirina wekhevîya derfetan ji zarokên wan re mîna parêzgehên din ên welêt.
