Şam-SANA
Werza genim a sala 2026an li Sûrîyê, kurteya vejîneke çandinîyê ya berbiçav e ku 14 nîşanderên jimareyî yên sereke wê radigihînin.
Tevî ku hinek ji van daneyên bingehîn – wekî qebareya hilberîna giştî û rûberên çandî – di zanyarîyên sazîyên peywendîdar de fena qonaxên girîng tên dubarekirin, lê bi giştî tabloyeke temam ji bo rastîya vê berhema stratejîk a yekem li welat xêz dikin.
1.4 milyon hektar û 3 milyon ton
Wezareta Çandinîyê di daxuyanîyekê de ji bo SANAyê dîyar kir ku rûberê çandî yê berhema genim di werza 2026an de gihîştiye nêzî 1.4 mîlyon hektarî.
Tê pêşbînîkirin ku hilberîn 3 milyon tonî derbas bike; ev yek wekî encama başbûna mercên avhewayê û vegera rûberên berfireh ên li bakurrojhilatê welat bo pêvajoya hilberînê tê nirxandin.
Heseke, Reqa û Heleb di hilberîna genim de li pêş in
Daneyên Wezareta Çandinîyê piştrast dikin ku parêzgehên rojhilat di nexşeya hilberîna genim de îsal jî di rêzên pêşîn de ne.
Parêzgeha Hesekê %37ê hilberîna giştî pêk tîne, piştre parêzgehên Reqa û Helebê her yek bi rêjeya %18 û Dêrezor bi rêjeya %11 tên.
Berawirda navbera 2025 û 2026an: Hilkişîna hilberînê
Berawirdkirina daneyên Wezareta Çandinîyê yên werza îsal û ya borî, asta bilindbûna hilberînê nîşan dide.
Hilberîna giştî di werza 2025an de tenê nêzî 934 hezar û 183 ton bû; wê demê herêmên bejî rûbirûyî pêleke hişkesalî û bêbaranîyê bûbûn, ku bûbû sedema rawestandina temamî ya hilberînê li wan herêman.
2.7 milyon ton hatine wergirtin û bazarsazî berdewam dike
Alîkarê Rêveberê Giştî yê Sazîya Dexlûdanê ya Sûrîyê Ehmed Qadûn di daxuyanîyekê de ji bo SANAyê got: “Pêvajoya wergirtina genim ji cotkaran berdewam e”.
Qadûn dîyar kir ku ji bo wergirtina genim, demeke dîyarkirî ya navendên wergirtinê tune ye û berdewamîya karê wan bi hatina berhemê ji zevîyan ve girêdayî ye.
Berfirehkirina depokirinê.. Wergirtina berhemê û parastina kalîteyê
Hevdem ligel berdewamîya wergirtinê, Sazîya Dexlûdanê ya Sûrîyê planeke tekûz ji bo depokirina berhemê û misogerkirina kalîteya wê bi rêve dibe.
Genim ji sayloyan re tê şandin û li wir bi berdewamî tê dermankirin û kontrolkirin.
Bazarsazîya elektronîk û “Sham Cash”
Di werza 2026an de, ji bo rêkxistina azarsazîyê mekanîzmaya qeydkirin û rezervasyona elektronîkî ya pêşwext hat sepandin.
Her wiha di çarçoveya pêşxistina karên îdarî û kêmkirina qelebalixîyê de, pergala otomasyona fatûreyan û xizmeta “Sham Cash”ê hatin xebitandin.
Platforma elektronîk gaveke erênî ye, lê!
Pisporê Geşepêdanê Ekrem El-Efîf di daxuyanîyekê de bo SANAyê dîyar kir ku platforma elektronîk ji bo rêkxistina bazarsazîyê gaveke erênî ye, lê hîn pêdivîya wê bi pêşxistinê heye da ku bêtir li gorî xwezaya karê çandinîyê be.
Daxwazên cotkaran
Wezareta Çandinîyê destnîşan kir ku daxwazên sereke yên cotkaran li ser kêmkirina lêçûnên hilberînê ne; nexasim bihayên tov, zibil û sotemenîyê.
Her wiha cotkar daxwaza dîyarkirina bihayekî hilberînê dikin ku lêçûnan dabîn bike û qezenceke guncav bide wan da ku bo çandina genim werin handan.
Yasayên nû ji bo xurtkirina ewlehîya xurekê
Di çarçoveya amadekarîyên werza bê de, Wezareta Çandinîyê dîyar kir ku ew li ser nûkirina yasa û sîstemên sektora çandinîyê dixebite.
Armanc hêsankirina hawirdekirina pêdivîyên hilberînê û afirandina pêşbazîyê di navbera şirketan de ye da ku kelûpel bi bihayê kêmtir û kalîteya bilindtir bigihîjin cotkaran, ku ev yek dê bibe sedema berfirehkirina rûberên çandî.
