Şam – Taybet
Rêveberîya Çanda Zarokan li Wezareta Çandê, bi hevkarîya Navenda Enberê ya Civakî, duh Şemîyê çalakîyeke çandî, hunerî û civakî ya hevbeş (Erebî – Kurdî) li Pirtûkxaneya Niştimanî ya Sûrîyê li Şamê li dar xist. Di çalakîyê de hunera şêwekarî, şano, muzîk û mîrata gelêrî hatin pêşkêşkirin.
Pêşangeha Hunerî
Saet yekê nîvro vebû; tê de zêdetirî 80 tabloyên hunerî yên zarok û ciwanên ji Şam û Efrînê hatin nîşandan. Her wiha karên destan ên curbecur mîna kinc û berhemên ji hirî, ku hinek ji wan berhemên kampên koçberan bûn, di hola sereke ya pirtûkxaneyê de hatin pêşandan.
Pêşandanên Hunerî
Saet çarê êvarî li ser dika hola konferansan pêşandanên hunerî dest pê kir. Zarokên ji Şam û Efrînê şanonameyek pêşkêş kirin ku tê de qonaxên Şoreşa Sûrîyê hatin nîşandan. Ligel vê yekê, helbest û stranên bi zimanê Erebî û Kurdî yên seranserê Sûrîyê hatin xwendin. Her wiha kurtefîlmên dokumantar ên dîmenên şehîd Ebdulbasit Sarût, şehîd Mişel Temo û hunermenda koçkirî Mey Sekaf hatin nîşandan.
Mîrata Hunerî
Çalakîyê stran û govendên folklorî yên Kurdî û Erebî ku mîrata Şam û Efrînê ne li xwe girt. Her wiha Koma Koral a ji bajarê Selemîyê wek mêvanê rûmetê beşdar bû û berhemên curbecur ji mîrata Sûrîyê pêşkêş kirin.
Beşdarîya Civakî
Mêvanê din ê rûmetê Navenda Bihêzkirina Jinan a ji Îdlibê bû, ku karên destan ên xelkê kampan pêşkêş kirin. Di dawîya çalakîyê de, kesayetên civakî yên ku alîkarîya koçberên Xûteyê li Efrînê kiribûn, hatin xelatkirin.
Rêveberê Giştî yê Navenda Enberê ya Civakî Amir Zeydan ji SANAyê re ragihand ku ev festîval encama xebata salên dirêj e, ji dema koçberîyê heta vegera piştî rizgarkirinê. Dîyar jî kir ku komele di sala 2013an de li Xûteya Şerqî hatiye damezirandin û piştî koçberîya 2018an li Efrînê berdewam kiriye û armanca wan xizmeta zarok, ciwan, xwendekar, kal û pîr û jinan e. Zeydan hêvî jî xwest ku çalakîyên bi vî rengî li hemû bajarên Sûrîyê bidomin.
Muzîkjen û mamosteyê muzîkê yê zarokan û serpereştê karên hunerî yên Kurdî Fethî Şêxo ji SANAyê re anî ziman ku beşdarîya wan peyameke aştî û yekîtîyê ye di navbera hemû pêkhateyên Sûrîyê de. Wî destnîşan kir ku koma wan piştî rizgarkirinê nû hatiye damezirandin û ev cara yekem e ku li Şamê çalakîyê dikin.
Sînan Al Reşî, wek nûnerê Taxa Kurdan û çalakvanekî şoreşger ku piştî 13 salan ji girtîgehê rizgar bûye, axivî. Wî behsa fedakarîyên şehîdên Taxa Kurdan li Şamê kir û got ku di serdema rejîma berê de Kurd ji ber fêrbûna ziman an çalakîyên çandî dihatin girtin. Wî tekez kir ku îro rewş guherîye; li Taxa Kurdan bi piştgirîya parêzgehê û wezaretê navendeke çandî hatiye vekirin ku dersên zimanê Kurdî û çalakîyên hunerî dide. Al Reşî li dawîyê jî got ku divê hemû pêkhateyên Sûrîyê (Ereb, Kurd, Çerkes û hwd.) bi hev re vî welatî ava bikin.
Ev çalakîya li Pirtûkxaneya Niştimanî ya Şamê bûyereke bêhempa bû ku cara yekem di dîroka Sûrîyê de huner, çand û mîrat bi vî rengî gihandin hev, û peyama yekîtî û pirrengîya Sûrîyê xurt kir.
