Nador-SANA
Li bajarê Nador ê Mexribê, çardemîn Festîvala Navdewletî ya Sînemayê û Bîra Hevbeş (International Festival of Cinema and Common Memory) ku ji 15 heta 20ê Mijdarê berdewam kir, bi şeveke xelatdayînê bi dawî bû. Di festîvalê de fîlmê ku çîroka biêş a malbateke Kurd vedibêje, mohra xwe li şevê xist.
Di kategorîya belgefîlman de, fîlmê “Darên Bêdeng” (Silent Trees) yê derhênera Polonî Agnieszka Zwiefka, xelata yekemîn wergirt. Fîlm behsa serpêhatîya malbateke Kurd dike ku hewl didin di ser sînorê Belarûs û Polonyayê re derbasî Ewropayê bibin.
Di wan daristanên sar û bi-berf de, dayika malbatê jîyana xwe ji dest dide û keça wan a 16 salî Rona, berî wexta xwe mezin dibe; ew neçar dimîne ku barê xwedîderketina li xwişk û birayên xwe yên biçûk bigire ser milên xwe. Fîlm ronahîyê dide ser rewşên mirovî yên taybet û kûr.
Biryara Yekdengî ya Jûrîyê
Fîlm ji alîyê komîteya jûrîyê ve, ku serokatîya wê Wezîra berê ya Çandê ya Fransayê Necat Belqasim dikir, bi yekdengî hêjayî xelatê hat dîtin. Di nava endamên jûrîyê de, romannivîsê navdar ê Kurd Jan Dost jî cih girt.
Jan Dost: “Fîlmê me li hemberî berhemên girîng bi ser ket”
Endamê jûrîyê Jan Dost têkildarî xelatê ji ajansa SANAyê re daxuyanîyek da. Dost dîyar kir ku fîlmê “Darên Bêdeng” di pêşbirkê de li hemberî şeş belgefîlmên din ên girîng têkoşîyaye ku hemûyan behsa şer, tundî û bandora wan a li ser jîyana mirovan dikir.
Dost derbarê fîlmên din ên pêşbirkê de ev agahî dan: “Di nav fîlmên ku rikberî dikirin de; fîlmê ‘Ez ê Te Ji Bîr Nekim’ ê derhênerê Mexribî Mihemed Riza Geznayî ku behsa bapîrê xwe yê di Şerê Colanê (1973) de şer kiriye dike, fîlmê ‘Kubayî’ yê Ezîz Axwadir ku dabaşa zarokên penaber ên Sehrawî yên birine Kubayê dike, hebûn. Her wiha fîlmên ‘Derbarê Agir De’ yê li ser tundîya dij-kapîtalîzmê li Swîsreyê, ‘Serxwebûna Cezayîrê Dozeke Mexribî ye’ û fîlmê ‘Şervan’ ê li ser şerê navxweyî yê Spanyayê jî di pêşbirkê de bûn.”
Xelatên Din ên Festîvalê
Di festîvala ku îsal 14emîn car hat lidarxistin de, di kategorîyên din de jî xelat hatin belavkirin:
Fîlmê Dirêj ê Herî Baş: Xelat çû ji fîlmê “Otobus 47” re.
Kurtefîlmê Herî Baş: Xelat bi fîlmê “Deqa Bayê” (Weşm el-Rîh) hat dayîn.
