Eman-SANA
Hikûmeta Japonyayê bi bihayê 250 hezar dolarî alîkarîyeke darayî ji bo piştgirîkirina hewldanên Rêxistina Neteweyên Yekbûyî ya Zarokan “UNICEF”ê di domdarkirina xizmetguzarîyên av, binesazîya tenduristî û paqijîyê de ji bo penaberên Sûrî yên li Kampa Zeterîyê ya li Urdunê, pêşkêş kir.
Ajansa Nûçeyan a Urdunê “Petra”yê îro Yekşemê dîyar kir ku ev projeya ku di navbera salên 2026 û 2027an de dirêj dibe, armanc dike ku dabînkirina berdewam a ava paqij ji bo malbatên penaber misoger bike, di bin sîya zêdebûna daxwaza demsalî û berdewamîya liv û tevgera xelkê li hundirê kampê.
Proje cîbicîkirina bernamayeke rahênana pîşeyî û teknîkî ji bo 50 penaberên Sûrî di warên lorî (lûlekêşî) û tenduristîya jîngehê de li xwe digire. Ev gav ji bo bihêzkirina behreyên wan ên pratîkî tê avêtin da ku di paşerojê de bibe piştgir ji bo derfetên kar û dabînkirina jîyana wan û vegera li Sûrîyê jî di nav de.
Nûnerê “UNICEF”ê li Urdunê Mark Rubin got: “Gihîştina ava paqij û xizmetguzarîyên binesazîya tenduristîyê ya ewle, hêmayeke bingehîn e ji bo parastina tenduristîya zarok û malbatan.” Navborî pesna piştgirîya berdewam a Japonyayê ji bo civakên herî lawaz û hewcedar da.
Ji alîyê xwe ve, Balyozê Japonyayê li Urdunê Asari Hideki tekez kir ku piştgirîya welatê wî ji bo hewldanên Urdunê yên di mêvandarîkirina penaberên Sûrî de berdewam e, û destnîşan kir ku ev alîkarî armanc dike ku berdewamîya xizmetguzarîyên bingehîn li hundirê kampê misoger bike.
Japonya di astên cîhanî û niştimanî de wekî hevkarekî demdirêj ê UNICEFê tê hesibandin, ku ev bexşîn beşdarîyê di girtina hewcedarîyên darayî yên bingehîn de dike da ku berdewamîya dabînkirina av û xizmetguzarîyan ji bo nêzîkî 49 hezar penaberên ku li Kampa Zeterîyê niştecih in, were misogerkirin.
UNICEF xebata xwe ligel Hikûmeta Urdunê û hevkarên xwe didomîne da ku gihîştineke domdar û dadperwerane ji bo xizmetguzarîyên bingehîn ji bo penaber û civakên mêvandar ên herî hewcedar li herêmên cuda yên şaneşînê peyda bike.
